Serbia dhe BE nënshkruajnë paraprakisht SAA

08/11/2007

Serbia dhe BE kanë nënshkruar paraprakisht një marrëveshje stabilizimi dhe shoqërimi parë si një hap i parë kyç drejt anëtarësimit. Megjithatë, bashkëpunimi i plotë me gjykatën e OKB-së për krimet e luftës mbetet një kusht për nënshkrimin e vërtetë të saj.

Nga Igor Jovanoviç për Southeast European Times në Beograd – 08/11/07

(Nga e majta): Presidenti serb Boris Tadiç, nënkryeministri serb Bozhidar Djeliç dhe komisioneri për zgjerimin e BE Olli Rehn, nënshkruajnë marrëveshjen e stabilizimit dhe shoqërimit në selinë e BE në Bruksel të mërkurën (7 nëntor). [Getty Images]

Nënkryeministri Bozhidar Djeliç dhe komisioneri i zgjerimit të BE Olli Rehn nënshkruan në Bruksel të mërkurën (7 nëntor) një marrëveshje stabilizimi dhe shoqërimi (SAA). Ceremonia u ndoq gjithashtu nga presidenti serb Boris Tadiç.

Masa erdhi pasi kryeprokurorja e OKB-së për krimet e luftës Karla del Ponte informoi Rehn se Beogradi kishte bashkëpunuar mjaftueshëm me gjykatën e Hagës. Megjithatë, ajo e ka bërë të qartë se dorëzimi i Ratko Mlladiç, paditur për genocid në Srebrenicë në 1995, mbetet një kusht për nënshkrimin përfundimtar dhe vënien në zbatim të marrëveshjes.

Nënshkrimi paraprak do të thotë se teksti është vendosur dhe nuk do t'i bashkëngjiten ndryshime të tjera thelbësore. Megjithatë, ai do të futet në fuqi pasi të nënshkruhet përfundimisht.

Tadiç tha se ai shpresonte se kjo do të ndodhte në disa javë. Mlladiç dhe të arratisurit e tjerë të mbetur do të dorëzohen në gjykatën e OKB-së për krimet e luftës në qoftë se ata fshihen në Serbi, premtoi ai.

"Disa nga të paditurit mund të mos jenë në Serbi," tha ai. "Kjo është se pse unë nuk mund të them se do të arrestojmë disa nga ta. Por në qoftë se ata janë në territorin serb, është e sigurtë se do t'i arrestojmë dhe ekstradojmë në Hagë," tha presidenti.

Rehn tha se ai shpresonte se marrëveshja do të nënshkruhej përfundimisht së shpejti por shtoi se kjo varej nga veprimet e Beogradit.

Disa analistë politikë kanë thënë se nënshkrimi paraprak i marrëveshjes, origjinalisht për në tetor, por i shtyrë për shkak të bashkëpunimit të pamjaftueshëm me gjykatën, ishte me qëllim që të inkurajonte bllokun demokratik në Serbi ndërsa ajo ndeshej me vështirësitë e çështjes së statusit të Kosovës. Megjithatë Rehn mohoi çdo qëllim të tillë.

"Kosova po trajtohet brenda OKB-së ndërsa procesi i shoqërimit me BE po drejtohet në një tjetër pistë," tha ai.

"Do të ishte gabim të pritej që Serbia apo ndonjë vend tjetër të jepte Kosovën për hatër të pranimit më të shpejtë në BE. Debati politik në Serbi duhej të ridrejtohej nga e kaluara nacionaliste te e ardhmja evropiane," shtoi Rehn.

Koshtunica tha se nënshkrimi paraprak tregon se qeveria serbe është "në rrugën më të mirë të demonstrimit se ajo mundet njëherazi të trajtojë me sukses integrimin në BE dhe të mbrojë integritetin dhe sovranitetin e vendit" nëpërmjet bisedimeve të Kosovës.