Bordi i PIC mbështet masat e propozuara nga Lajçak për forcimin e institucioneve të BiH

01/11/2007

Duke u kërkuar politikanëve në Bosnjë e Herzegovinë t'u përmbahen detyrimeve të tyre, një organizëm kyç zyrtarësh ndërkombëtarë paralajmëroi të mërkurën se orvatjet për të penguar Marrëveshjen e Paqes të Dejtonit nuk do të tolerohen.

(Office of the High Representative, Reuters, AP, DPA, Fena - 31/10/07)

Bordi drejtues i PIC njoftoi se "mbështet vendimet dhe veprimet e propozuara nga Përfaqësuesi i Lartë, të cilat janë plotësisht në përputhje me mandatin e tij dhe kushtetutën e BiH". [OHR]

Duke shprehur mbështetjen e plotë për Përfaqësuesin e Lartë Miroslav Lajçak, një organizëm kyç zyrtarësh ndërkombëtarë u kërkoi politikanëve në Bosnjë dhe Herzegovinë (BiH) të mërkurën (31 tetor) të respektojnë dhe zbatojnë vendimet e fundit të Lajçak mbi reformën institucionale.

Seria e veprimeve që ai propozoi në 19 tetor "është plotësiosht në përputhje me mandatin e tij dhe kushtetutën e BiH", tha në një deklaratë bordi drejtues i Këshillit për Zbatimin e Paqes (PIC) në fund të takimit të vet dy-ditor në Sarajevë. "I vetmi objektiv i këtyre masave është të rregullojnë procesin vendim-marrës në këshillin e ministrave dhe në parlament dhe ato janë të domosdoshme për përshpejtimin e procesit të reformës."

Veprimet që Lajçak do që të zbatohen deri në 1 dhjetor përfshijnë ndryshime në rregullat e kuorumit që do ta bënte më të vështirë për anëtarët e qeverisë dhe parlamentit nga secili komunitet etnik për të bllokuar miratimin e vendimeve apo ligjeve duke mos marrë pjesë.

Masa e Përfaqësuesit të Lartë tërboi politikanët serbë boshnjakë. Ligjebërësit në parlamentin e Republika Srpska (RS) miratuan një deklaratë të enjten duke kundërshtuar masat e propozuara si anti-kushtetuese dhe në kundërshtim me Marrëveshjen e Paqes të Dejtonit.

Duke kritikuar politikanët për përpjekjen për të nxitur një krizë politike për të sfiduar autoritetin dhe legjitimitetin si të Lajçak dhe të PIC, bordi drejtues u kërkoi "krerëve të RS t'u përmbahen detyrimeve të tyre" në vend të kësaj.

Duke vënë në dukje se situata në BiH kishte përkeqësim të mëtejshëm që nga takimi i mëparshëm në qershor, zyrtarët ndërkombëtarë paralajmëruan gjithashtu krerët politikë nga të dy njësitë se përdorimi i retorikës agresive dhe përpjekjet për të penguar përparimin nuk do të toleroheshin.

"Bordi drejtues i PIC përsërit se nuk do të qëndrojë pasiv përballë deklarimeve apo veprimeve provokative," thanë drejtorët politikë nga vendet dhe organizatat anëtare të bordit, në deklaratën e tyre.

Anëtarë të bordit drejtues janë Britania, Kanadaja, Franca, Gjermania, Italia, Japonia, Rusia dhe Shtetet e Bashkuara, presidenca e BE, Komisioni Evropian dhe Organizata e Konferencës Islamike.

"Çdo udhëheqës politik apo institucion i BiH që do të kundërshtojë Përfaqësuesin e Lartë dhe bordin drejtues të PIC do të jetë subjekt i masave të duhura," thoshte deklarata.

Ajo gjithashtu paralajmëronte se "komuniteti ndërkombëtar ka instrumentet e duhura për t'u bërë ballë prirjeve shkatëruese dhe se nuk do të lejojë orvatje për të penguar Marrëveshjen e Paqes të Dejtonit, qoftë nga jashtë, qoftë nga brenda vendit."

Javën e shkuar, kryeministri serb Vojislav Koshtunica i përshkroi masat e propozuara nga Lajçak si një "kërcënim të hapur ndaj interesave thelbësore të popullit serb" dhe që synonin shfuqizimin e Republika Srpska. Në deklarimin e tij në 25 tetor, Koshtunica la gjithashtu të kuptohej se politikat e Lajçak qenë pjesë e një plani anti-serb për t'i dhënë pavarësinë Kosovës.

Ndërsa i bashkohej anëtarëve të tjerë të bordit drejtues në mbështetjen e tyre për Lajçak, Rusia kritikoi kohën e masës së tij për të ndryshuar procedurat e votimit për miratimin e vendimeve dhe legjislacionit.

"Duke marrë parasysh mungesën e marrëveshjes mbi këto masa ndërmjet krerëve të BiH, Federata Ruse konsideron se përpunimi i masave në një mjedis më të qëndrueshëm do të kishte qenë më produktiv," tha Rusia në një shënim të veçantë në fund të deklaratës.