Shqipëria, Kroacia dhe Maqedonia marrin votën e besimit

12/10/2007

Asambleja Parlamentare e NATO miratoi një rezolutë që i bën thirrje Aleancës të nisë bisedimet e anëtarësimit me Shqipërinë, Maqddoninë dhe Kroacinë në 2008, duke u bazuar në atë se kushtet e nevojshme qenë përmbushur.

Nga Zoran Nikolovski për Southeast European Times në Shkup – 12/10/07

Sekretari i përgjithshëm i NATO-s Jaap de Hoop Shefer tha se zgjerimi i Bukureshtit nuk do të jetë i fundit për Aleancën. [Getty Images]

Shqipëria, Kroacia dhe Maqedonia morën një sinjal të fortë mbështetjeje të martën (9 tetor) për përpjekjet e tyre për t'u bashkuar me NATO-n. Të takuar në Rejkjavik, Islandë, përfaqësuesit e parlamenteve kombëtare të 26 vendeve anëtare të NATO-s kaluan një rezolutë që mbështet ofertat e vendeve për pranimin.

Në samitin e prillit në Bukuresht, krerët e vendeve dhe qeverive të NATO-s duhet të lëshojnë ftesat për bisedime me "vendet aspirante të vlerësuara të jenë gati dhe pranimi i të cilëve është gjykuar se forcon sigurinë dhe stabilitetin në zonën euro-atllantike", thotë rezoluta e Asamblesë Parlamentare e NATO-s.

Ajo u kërkon vendeve anëtare të NATO-s të bëjnë fushatë aktive në parlamentet respektive kombëtare për ratifikimin e protokolleve të nevojshme. Përveç kësaj, ajo bën thirrje për vazhdimin e politikës "së dyerve të hapura" të NATO-s edhe pas samitit.

"Ne kemi punuar shumë në kontekst të Planit të Veprimit të Anëtarësimit për të ndihmuar Shqipërinë, kroacinë dhe Maqedoninë në përgatitjet e tyre për anëtarësim," tha në takim sekretari i përgjithshëm i NATO-s Jaap de Hoop Shefer.

"Si në raundet e mëparshme të zgjerimit, vendimi i Bukureshtit do të jetë përfundimisht një vendim politik. Dhe këtu është një rol i qartë dhe me të vërtetë një përgjegjësi, për ju parlamentarët në këtë proces," u tha ai përfaqësuesve.

Ai shprehu besim se një vendim zgjerimi në Bukuresht nuk do t'i japë fund shtirjes së NATO-s dhe se anëtarët e Partneritetit për Paqe mund të vështrojnë përpara për t'u bërë anëtarë të plotë në të ardhmen.

Së bashku me këtë shfaqje mbështetjeje, Asambleja Parlamentare u kërkoi Shqipërisë, Kroacisë dhe Maqedonisë të intensifikonin reformat në muajt e ardhshëm.

Një raport nga nënkomiteti i Asamblesë për aftësitë mbrojtëse dhe sigurimin e ardhshëm, tha se Shqipëria duhet të vazhdojë përmirësimin e rendit të ligjit, reformimin e forcave të veta të armatosura dhe luftën kundër korrupsionit dhe krimit të organizuar.

Maqedonia duhet të tregojë përparim të vazhdueshëm në reformat politike, ekonomike e të mbrojtjes dhe në rritjen e rendit të ligjit, thoshte raporti. Kroacia jo vetëm që duhet të mbajë qëndrueshmëri në përparimin e reformave por duhet të punojë gjithashtu për të përmirësuar mbështetjen për pranimin në NATO në opinionin publik.

Sipas nënkomitetit, përparimi në këto fusha do të rritë shanset e një ftese në 2008 për të treja vendet. "Anëtarësimi në NATO jo vetëm që do t'i bashkojë të sigurta këto tre vende brenda komunitetit evro-atllantik por do të krijojë shtysë politike për pjesën tjetër të rajonit për të shtyrë me forcë për reformë gjithashtu," thoshte raporti.

Të tre vendet u vlerësuan për kontributin në operacionet e NATO-s, veçanërisht në Forcën Ndërkombëtare të Ndihmës së Sigurisë (ISAF) të kryesuar nga NATO në Afganistan. Të gjithë ata marrin pjesë rregullisht në stërvitjet ushtarake me NATO-n dhe në të gjithë ata, reformat e mbrojtjes janë përqëndruar në ngritjen e forcave të vogla, profesionale e moderne, të zhvendosëshme që mund të punojnë në kontekstin e NATO-s.

Shumë bankoprova të reformës së mbrojtjes kërkuar nga NATO janë përmbushur, duke përfshirë ngritjen e dokumenteve strategjike kombëtare dhe ligjore si edhe ristrukturimin dhe pakësimin e forcave.