Maqedonia përshëndet njohjen e emrit kushtetues nga Kanadaja

21/09/2007

Vendimi i Kanadasë për të përdorur emrin kushtetues të Maqedonisë në marrëdhëniet e ndërjsellta me vendin ballkanik u përshëndet në Shkup të enjten, por jo nga Greqia e cila kundërshton që fqinji i vet të mos quhet ndryshe veç Ish REpublika Jugosllave e Maqedonisë (FYROM).

(AFP, AP, Reuters, DPA, Bloomberg, The Canadian Press, MIA, Makfax, MRT, Balkan Investigative Reporting Network, Xinhua, Dnevnik.bg - 20/09/07)

Ministrja e jashtme greke Dora Bakojanis pritet të flasë me homologun e saj kanadez dhe t'i përvcjellë pakënaqësinë e qeverisë greke. [Getty Images]

Zyrtarët maqedonas përshëndetën të enjten (20 shtator) vendimin e Kanadasë për të njohur vendin e tyre nën emrin kushtetues, Republika e Maqedonisë, ndërsa autoritetet greke u zotuan të protestojnë ndaj masës.

Emri i Maqedonisë është çështja më e diskutueshme në marrëdhëniet midis Shkupit dhe Athinës. Greqia këmbëngul që fqinjit të saj duhet t'i referohet vetëm si Ish Republika Jugosllave e Maqedonisë (FYROM), emri nën të cilin ajo u pranua në OKB në 1993.

Megjithse organizatat ndërkombëtare, duke përfshirë BE dhe NATO ndjekin parimin, 117 vende në botë e njohin vendin ballkanik me emrin e vet kushtetues. Bullgaria, vendi i parë që e njohu Maqedoninë si shtet rë pavarur, të gjitha ish republikat jugosllave si edhe anëtarët permanentë të Këshillit të Sigurimit Kina, Rusia dhe Shtetet e Bashkuara, janë midis këtyre vendeve.

Kanadaja vendosi të bashkohet me grupin të mërkurën. Ajo do të përdorë emrin kushtetues të Maqedonisë në marrëdhëniet e ndërsjellta me vendin, por, siç thuhet, do të vazhdojë t'i referohet atij si FYROM në komunikimet ndërkombëtare.

"Ne jemi informuar nga ambasada jonë se Kanadaja ka njohur Maqedoninë nën emrin e vet kushtetues," tha kryeministri Nikola Gruevski në vërejtjet e tij në radion shtetërore maqedonase të enjten. "Ky është një lajm i mrekullueshëm për ne dhe ne e përshëndesim këtë masë."

Grekët megjithatë, nuk qenë dakord. "Ne nuk jemi të kënaqur me këtë vendim," tha zëdhënësi i ministrisë së jashtme Jorgos Kumutsakos . "Është vetëm e natyrshme që qindra mijra grekë që jetojnë në Kanada të jenë gjithashtu të pakënaqur me këtë vendim." Sipas një raporti të Reuters, reagimi midis disa anëtarëve të disaporës greke në Kanada tregoi se Kumutsakos kishte të drejtë.

"Grekët [në Kanada] duken të zemëruar," dhe po planifikojnë të protestojnë ndaj masës, Reuters citonte Xhim Karigianis, një anëtar i parlamentit me origjinë greke, të thoshte.

Ministrja e jashtme greke Doprta Bakojanis pritet të ngrejë çështjen gjatë bisedimeve të saj të dielën me Methju Nimetz, ndërmjetësi i OKB për çështjen e emrit të Maqedonisë, gjatë vizitës së saj në Nju Jork për një veprimtari të sponsorizuar nga OKB mbi ndryshimin e klimës.

Greqia, e cila ka një krahinë në veri që quhet Maqedoni, shprehu kundërshtime ndaj përdorimit prej fqinjit të këtij emri, menjëherë pasi ai deklaroi pavarësinë në fund të 1991, duke u trëmbur nga pretendime të mundëshme territoriale.

Në 1995, të dy vendet nënshkruan një Marrëveshje të Brendëshme ku zotoheshin të vazhdonin përpjekjet për të zgjidhur çështjen, gjë që e lejoi Maqedoninë të bashkohej me një numër organizatash ndërkombëtare jashtë OKB, të tilla si OSBE dhe Këshilli i Evropës, si FYROM. Maqedonia është aktualisht një kandidate zyrtare e BE, një anëtare e programit të Partneritetit për Paqe të NATOs- dhe shpreson të ftohet të bashkohet me Aleancën vitin e ardhëshëm.

Gjatë fushatës përpara zgjedhjeve parlamentare të së dielës, kryeministri grek Kostas Karamanlis sugjeroi se Athina do të bllokojë hyrjen e Shkupit si në BE dhe në NATO deri sa të zgjidhet çështja e emrit.