Ish-kryeministri maqedonas i hiqet imuniteti për tu hetuar

21/08/2007

Vendimi i të hënës nga parlamenti i hap rrugën arrestimit të mundshëm të Vlado Buçkovskit në lidhje me një skandal blerje armësh.

(Utrinski vesnik - 21/08/07; MIA, Makfax, AP, Xinhua - 20/08/07; Makfax, Balkan Investigative Reporting Network - 17/08/07; Balkan Investigative Reporting Network - 03/08/07)

Akuzat kundër ish-kryeministrit maqedonas Vlado Buçkovski kanë prejardhjen nga posti i tij i mëparshëm si ministër i mbrojtjes. [Getty Images]

Ligjvënësit nga partitë qeverisëse të Maqedonisë votuan të hënën (20 gusht) për ti hequr ish-kryeministrit Vlado Buçkovski imunitetin e tij për tu hetuar. Ai ka mundësi të arrestohet me akuzat e përfshirjes në një marrëveshje blerje armësh që i kushtoi vendit 3 milion euro.

Nga 120 anëtarë të parlamentit, 59 votuan për ti hequr imunitetin Buçkovskit. Nuk kishte asnjë abstenim zyrtar. Partitë e opozitës bojkotuan votimin.

Një komision parlamentar i hoqi në fillim imunitetin Buçkovskit më 2 gusht, por partia kryesore opozitare Bashkimi Social Demokratik për Maqedoninë (SDSM) e akuzoi vendimin se kishte shkelur rregullat e procedurës. SDSM kërkoi një seancë të plotë parlamentare për të trajtuar çështjen.

Debati filloi të enjten dhe u karakterizua nga shkëmbime akuzash dhe ofendimesh të vashdueshme midis deputetëve të SDSM dhe atyre të partisë qeverisëse VMRO-DPMNE të kryeministrit Nikola Gruevski.

Buçkovski, tani një deputet i SDSM, deklaroi se është viktima e një persekutimi dhe ka mohuar akuzat kundër tij.

"Unë nuk kërkoj falje, sepse ju nuk jeni juria," tha ai, duke folur para ligjvënësve para votimit të së hënës. "Unë jam i pafajshëm."

Çështja e blerjes së armëve e ka zanafillën në vitin 2001, kur Buçkovski shërbente si ministër i mbrojtjes. Ish-shefi i shtabit të përgjithshëm të ushtrisë maqedonase, gjenerali në pension Metodi Stamboliski, pretendohet se urdhëroi katër herë më shumë pjesë rezervë për tanket e ushtrisë T-55 se nevojiteshin në të vërtetë. Ai u arrestua në gusht dhe u lirua në bazë të një garancie disa ditë më parë.

Një tjetër i dyshuar i rëndësishëm në çështje është Mitre Petkovski, manaxheri i kompanisë maqedonase të metaleve MZT FOP, të cilit ju kërkua të furnizojë pjesët e rezervës.

Buçkovski, Stamboliski dhe Petkovski janë akuzuar se "kanë përfituar dukshëm materialisht për veten e tyre duke dëmtuar buxhetin e shtetit".

Dy zyrtarë të tjerë të ministrisë së mbrojtjes janë akuzuar gjithashtu. Buçkovski deklaroi se roli i tij në çështjen e diskutuar të armëve është hetuar tashmë në vitin 2002, kur të gjitha akuzat kundër tij u hodhën poshtë.

Duke e përshkruar çështjen si një "montim politik", Buçkovski i tha ligjvënësve të hënën se qeveria aktuale po kryen "një luftë selektive kundër krimit të organizuar dhe korrupsionit".

SDSM ka kërkuar që çështja të vendoset nën monitorimin e organizatave ndërkombëtare, duke përfshirë OSBE-në.