Rumani: film i ri i Hollivudit

02/08/2007

Peisazhi spektakular i Rumanisë dhe kostoja e ulët e punës kanë ngjallur një interes në rritje midis filmabërësve.

Nga Paul Kiokoiu për Southeast European Times në Bukuresht – 02/08/07

Aktorja Nikoce Kidman ishte në Rumani për të filmuar "Mali i ftohtë". [Getty Images]

Në vitet e fundit, Rumania është kthyer në një parajsë prodhimi të Hollivudit, kryesisht për shkak të kostos së ulët. Filma të mëdhej janë bërë tani në vend, me pjesëmarrjen e të tillëve si Nicole Kidman, Jude Law, Wesley Snipes, Renee Zellweger dhe Jean-Claude van Damme.

Dy studiot e mëdha rumune po gëzohen të shohin një shpërthim të pashembullt në biznes. Ato janë Castel Film, vendosur 40 km larg Bukureshtit, në fshatin Ciolpani dhe Mediapro Studios, bazuar në qytetin Buftea. Ky i fundit është një nga grupet më të mëdha të medias dhe zbavitjeve në Evropën Lindore.

Një moment kthese, lidhur me interesin e Hollivudit, erdhi me "Mali i ftohtë", një histori e luftës civile vendosur në kodrat e Karolinës së veriut. Me lojën e Law, Kidman dhe Zellveger, ai u filmua në Rasnov të Transilvanisë juglindore.

"Pa kursimet që ofronte Rumania, "Mali i ftohtë" absolutisht nuk do të ishte bërë," tha prodhuesi Albert Berger, që llogarit se kostoja e ulët e punës së vendit shkurtoi më tepër se 20 milion $ nga buxheti i filmit. Filmi do të kishte kushtuar më tepër se 100 milion $ po të bëhej në Shtetet e Bashkuara, thotë Berger.

Ministria e jashtme e Rumanisë, ndërkohë mori lejën të përdorë skenat nga filmi në një transmetim fushate turistike në CNM në 2004. Në reklamat, regjizori i filmit Anthony Minghella lavdëroi vendin dhe peisazhet e tij të paprishura.

Një tjetër film i SHBA, "Modilgiani" u xhirua në Mediapro. Aty luan Andy Garcia në rolin e piktorit të famshëm italian dhe ai kushton 14 milion $. Christopher Lambert dhe Adrian Paul luajtën në "Malësori: fundi i lojës", xhiruar në Kastel. BBC është tërhequr gjithashtu nga kostot e ulta të Rumanisë; ajo zgjodhi të xhirojë atje "Mbretëresha Meri e skocezëve". Rumania është gjithashtu një vend i favorizuar për dokumentarë të transmetuar në kanale të tillë si ZDF, Arte, Discovery dhe National Geographic.

Të huajt tani shpenzojnë rreth 50 milion $ në vit në shërbimet e prodhimit të filmit në Rumani dhe kjo sasi pritet të rritet. Rumania është një anëtar i ri i BE dhe ndikimi i pranimit në këtë industri mbetet të shihet. Sipas ekspertëve të fushës, vendi mund të presë të mbetet një Eden i filmabërësve në vitet që vijnë.