Plani i veprimit të duhanit i Serbisë çon në ratifikimin e CEFTA në shtator

06/06/2007

Pas miratimit të një plani veprimi për të rregulluar ligjet e duhanit të vendit më parë këtë vit, Serbia ka hapur rrugën tani për të ratifikuar traktatin e CEFTA me pjesën tjetër të rajonit.

Nga Davor Konjikushiç dhe Georgi Mitev-Shantek për Southeast European Times në Beograd -- 06/06/07

Qëllimi kryesor për CEFTA është të zhvillojë marrëdhëniet ekonomike midis vendeve anëtare. [CEFTA]

Ministria serbe e ekonomisë njoftoi më parë këtë javë se vendi do të ratifikojë Marrëveshjen e Tregtisë së Lirë të Evropës Qendrore (CEFTA) në shtator, duke i dhënë fund statusit si vendi i vetëm në rajon që nuk e ka bërë këtë.

Sekretarja e shtetit në ministrinë e ekonomisë dhe zhvillimit rajonal, Jasna Matiç tha të hënën (4 qershor) se me heqjen e pengesave midis Serbisë dhe Kroacisë, Bosnje dhe Herzegovinës dhe Maqedonisë, që përfshin taksimin e importit dhe eksportit, parlamenti mund të miratojë projekt ligjin e nevojshëm për të ratifikuar marrëveshjen.

Sipas marrëveshjes, objektivi kryesor i CEFTA është të "ngrejë një zonë të tregtisë së lirë nëpërmjet liberalizimit gradual të marrëdhënieve të ndërsjellta tregtare dhe me heqjen e barierave të tarifave dhe jo-tarifave të tregtisë gjatë një periudhe trazicionale."

"Duke u bërë një anëtar i CEFTA, Serbia do të përfitojë më shumë nga parimi i ashtuquajtur i akumulimit diagonal që lejon regjim të privilegjuar eksporti në tregun e BE të mallrave të prodhuara në më shumë se një vend anëtar të CEFTA," tha Matiç.

Në dritën e tregut të eksportit, anëtarët e CEFTA, Shqipëria, Bosnje dhe Herzegovina, Kroacia, Maqedonia, Moldavia, Mali i Zi dhe Kosova, kanë rënë dakord për planin e veprimit të qeverisë serbe për industrinë e duhanit i cili u miratua në mars.

Plani parashikon barazimin e detyrimit të aksizës mbi cigaret e vendit dhe të huaja që nga janari 2008, duke rritur taksën doganore nga 155 në 57.6% dhe do të vazhdojë nga 2008 në 2012 të rregullojë marrëdhëniet midis shtetit dhe industrisë së duhanit. Dokumenti ka për qëllim përmirësimin e industrinë e duhanit bujqësor, të rritë eksportin e prodhimeve të duhanit dhe të përmirësojë prodhimin e duhanit bujqësor.

Plani shfuqizon taksimin diskriminator të aksizës, duke parashikuar të njëjtin trajtim për markat e cigareve të vendit apo të huaja. Ai lehtëson gjithashtu detyrimin aktual për të blerë duhan vendi: kompanitë mund të blejnë deri në 20% të duhanit të tyre jashtë vendit.

Fabrikat e duhanit në Serbi janë të kënaqura me masën, duke thënë se ajo inkurajon investimin e vazhdueshëm në Serbi. Eugenio Sidoli menazheri i përgjithshëm i fabrikës së cigareve DIN në Nish, në pronësi të Philip Morris, tha se plani do të jetë më i kushtueshëm për duhanbërësit por kostoja do të kompensohet nga hyrja e kushteve të tregut dhe ndryshimeve të politikës së biznesit.

"Synimi është të fitohet një e ardhur e konsiderueshme aksize deri në 2012 pasi do të ketë një rritje të eksportit në industrinë e duhanit dhe do të inkurajohen fermerët për të rritur sasi më të mëdha duhani dhe të prodhojnë gjethe më të mira duhani," tha ministri për çështjet ekonomike Milan Parivodiç.

Që nga viti 2003, katër kompani duhani kanë investuar rreth 1 miliard euro në industrinë serbe të duhanit.

Parivodiç tha se plani lejon ratifikimin e CEFTA dhe e lë vendin të hapë negociatat për bashkimin me Organizatën Botërore të Tregtisë.