BDI kthehet në parlamentin maqedonas, PDSH mbetet në qeveri

30/05/2007

Një krizë në qeverinë maqedonase duket se është frenuar ndërsa partia më e madhe etnike shqiptare e vendit ka pranuar t'i japë fund bojkotit të parlamentit.

Nga Marina Stojanvska për Southeast European Times në Shkup - 30/05/07

Kreu i BDI Ali Ahmeti thotë se partia e tij do të kthehet në parlament. [Getty Images]

Partia më e madhe etnike shqiptare në Maqedoni, Bashkimi Demokratik për Integrimin (BDI) ka vendosur të rinisë pjesëmarrjen në parlament pas një bojkoti që zgjati gati katër muaj. Masa erdhi pasi u arrit një marrëveshje me partinë VMRO-DPMNE të kryeministrit Nikola Gruevski.

"Bisedimet politike u kompletuan me sukses," thanë Gruevski dhe kreu i BDI Ali Ahmeti në një deklaratë të përbashkët pas takimit të tyre të enjten (29 maj) i cili kurorëzoi javë negociatash.

Partitë thuhet se ranë dakord mbi 46 projekt-ligje që duhet të bien nën të ashtuquajturin parim i Badinterit, sipas të cilit disa kategori legjislacioni nuk mund të miratohen pa u miratuar së pari nga deputetët që përfaqësojnë pakicat etnike.

Përveç kësaj, ata ranë dakord të bëjnë ndryshime në komitetin e marrëdhënieve ndër-etnike të parlamentit me një anëtar të VMRO-DPMNE që do të zëvendësohet nga Bashkimi Social Demokartik i Maqedonisë (SDSM) e opozitës. SDSM do t'i jepet kështu shumica në komitet.

Reagimi nga BE dhe Shtetet e Bashkuara ishte i menjëhershëm me të dy ato që përshëndetën perspektivën që kriza politike që s'i qe ndarë Maqedonisë me muaj mund të kishte përfunduar.

Marrëveshja është "një hap i rëndësishëm përpara lidhur me proceset e integrimit të vendit ndaj BE dhe NATO-s", thoshte një deklaratë e përbashkët nga misioni i BE në Shkup dhe ambasada e SHBA.

Përfaqësuesi i BE në Maqedoni, Ervan Fuere komentoi mbi zhvillimet e fundit, duke theksuar nevojën për të përqëndruar të gjitha përpjekjet në procesin e reformës.

Vazhdimësia e reformave është jetike sepse vendi ndeshte me vendime vendimtare lidhur me anëtarësimin në BE dhe NATO, tha ai.

Përpara njoftimit të së majtës, pati një kthesë tjetër. Të shtunën, nënkryetari i partnerit të vogël të koalicionit qeverisës, Partisë Demokratike të Shqiptarëve (PDSH) Menduh Thaçi, tha se partia e tij po linte kabinetin. Një arsye, bëri me dije ai, ishte se VMRO-DPMNE qe në pragun e arritjes së një marrëveshjeje me BDI.

Artikuj që kanë lidhje

Duke folur në një intervistë me BBC në fundjavë, Ahmeti i BDI tha se ishte gati të nënshkruante një marrëveshje me Gruevskin që do të mbulonte çështje të tilla si pensionet për luftëtarët e UÇK dhe përdorimin e gjuhës shqipe, përveç ndryshimit të anëtarëve në komitetin e marrëdhënieve ndëretnike dhe ligjet e kategorizuara nën parimin e Badinterit.

Gruevski, megjithatë mohoi se VMRO-DPMNE dhe BDI kishin hyrë në ndonjë marrëveshje zyrtare.

"Asgjë nuk është thënë ndonjëherë rreth nënshkrimit të një marrëveshjeje. Ne nuk kemi rënë dakord për asgjë lidhur me përdorimin e shqipes dhe pensionet për luftëtarët e UÇK," tha kryeministri.

Ai u takua pastaj me Thaçin për të diskutuar rritjen e komunikimit midis VMRO-DPMNE dhe PDSH. Më pas gjatë ditës, VMRO-DPMNE njoftoi se koalicioni aktual dhe dialogu politik po vazhdonin.

Kjo përmbajtje është autorizuar nga SETimes.com.