Ligjbërësit e BE të ndarë rreth projekt-raportit të Kosovës

20/02/2007

Një projekt-raport i Parlamentit Evropian mbi të ardhmen e Kosovës që përmendte fjalën "pavarësi" pritet të ndezë debat midis ligjbërësve të BE muajin e ardhshëm.

(The Guardian, Blic - 20/02/07; EUobserver, European Parliament, AP, Reuters, DPA, Beta, B92 - 19/02/07)

Një raport i hartuar nga deputeti hollandez i PE, Joost Lagendijk thotë se Parlamenti Evropian "mbështet pikëpamjen se Kosovës i duhet dhënë pavarësia, dhe se sovraniteti i saj, gjatë një periudhe kohore, duhet të kufizohet nga një prani ndërkombëtare." [Getty Images]

Përdorimi i fjalës "pavarësi" në një projekt-raport mbi të ardhmen e Kosovës pritet të bëhet një pikë kundërshtimi midis anëtarëve të Parlamentit Evropian (PE) muajin tjetër.

PE "mbështet pikëpamjen se Kosovës i duhet dhënë pavarësia dhe se sovraniteti i saj duhet, gjatë një periudhe kohore, të kufizohet nga një prani ndërkombëtare" lexohet në raportin e hartuar nga deputeti hollandez i PE Joost Lagendijk nga Grupi i të Gjelbërve të legjislaturës.

Por sipas raporteve të hënën (19 shkurt), shumë ligjbërës janë kundër shkuarjes së BE një hap më tej se ajo që i dërguari i posaçëm i OKB-së Marti Ahtisaari ka përshkruar në propozimin e tij për një zgjidhje të çështjes së statusit të Kosovës. Plani i Ahtisaarit parashikon një vetëqeverisje të mbikqyrur ndërkombëtarisht për krahinën e cila është ligjërisht ende pjesë e Serbisë. Ai nuk përmend fjalën pavarësi.

Raporti i Lagendijk argumenton se pavarësia është "zgjidhja e vetme e qëndrueshme" për Kosovën, pasi do t'i japë asaj hyrje në institucionet financiare ndërkombëtare dhe do ta lejojë të lëvizë në udhën e vet për integrimin evropian. Në të njëjtën kohë, "sovraniteti i kufizuar nën mbikqyrjen ndërkombëtare është i nevojshëm me qëllim që të mbështetet karakteri shumëetnik i Kosovës dhe për të mbrojtur interesin dhe sigurinë e popullatës serbe dhe pakicave të tjera etnike," thotë drafti.

Bazuar në reaksionet e përzjera ndaj raportit të tij, deputeti hollandez i PE tregoi gadishmërinë e vet ta rifomulonte atë, për të siguruar që të marrë mbështetjen e duhur për miratim.

E vetmja diferencë që ai sheh midis raportit të vet dhe propozimit të Ahtisaarit është se i dërguari i OKB-së "nuk e quan atë pavarësi dhe unë e quaj," tha Lagendijk.

Komiteti i çështjeve të jashtme të PE voton mbi raportin e Lagendijk në 13 mars. Konsultimet me zyrtarët e Beogradit dhe Prishtinës mbi propozimin e Ahtisaarit fillojnë në Vienë këtë javë, të mërkurën dhe do të zgjasin deri në 2 mars. Tetë ditë më pas, një takim i nivelit të lartë do të mbahet në kryeqytetin austriak për të finalizuar propozimin e Ahtisaarit dhe për ta paraqitur atë në këshillin e Sigurimit të OKB-së përpara fundit të marsit.

Bisedimet e Vienës megjithatë, nuk pritet të çojnë në një marrëveshje midis zyrtarëve serbë e shqiptarë të Kosovës pasi të dy palët kanë treguar se kanë në plan t'i përmbahen qëndrimeve të tyre.

Shqiptarët e Kosovës që përbëjnë 90% të popullsisë 2 milionëshe të krahinës, po kërkojnë pavarësi të plotë nga Serbia. Beogradi është kundër me forcë ndaj pavarësisë së Kosovës dhe kundërshton haptazi propozimin e Ahtisaarit.

Duke pranuar "pak probabilitet" që bisedimet e Vienës të shpien në një kompromis, ndihmësi i Ahtisaarit, Albert Rohan tha se "nuk kishte alternativë ndaj propozimit të OKB-së".

"Serbia nuk humbet asgjë me planin e Ahtisaarit sepse Kosova nuk ka qenë nën rendin serb që nga viti 1999," është cituar ai t'i thoshte gazetës austriake Kurier. "Ne dëshirojmë të krijojmë kushtet në të cilat populli i Kosovës të jetojë i sigurt dhe normalisht. Në qoftë se serbët e Kosovës e konsiderojnë propozimin tonë pa paragjykim, ata nuk do të gjejnë arsye ta hedhin poshtë atë."