Arrihet më së fundi marrëveshja mbi qeverinë e BiH

11/01/2007

Nikola Spiriç, një profesor finance nga Banja Luka, është kryeministri i ri i BiH në kuadrin e një marrëveshjeje të arritur midis partive që fituan zgjedhjet e fundit të përgjithëshme.

Nga Antonio Prlenda për Southeast European Times në Sarajevë – 11/01/07

Anëtarët e presidencës së BiH: Haris Silajxhiç (majtas), Zheljko Komsiç (i dyti nga e majta) dhe Nebojsha Radmanoviç (i dyti nga e djathta), përgëzojnë kryeministrin e ngarkuar Nikola Spiriç. [Getty Images]

Tre muaj pas zgjedhjeve të përgjithëshme në Bosnjë dhe Herzegovinë (BiH), partitë fituese politike ranë dakord përfundimisht mbi një përbërje etnike të qeverisë së re dhe asamblesë parlamentare.

Në sesionin e 3 janarit të presidencës së re tre-palëshe të kryesuar nga kryetari i saj Nebojsha Radmanoviç, partitë pranuan që kryeministri i ri i BiH të ishte Nikola Spiriç, 50 vjeç, një profesor i financave serb boshnjak dhe ish anëtar i parlamentit nga partia SNDS.

Spiriç do të shërbejë si kryetar i këshillit të ministrave të BiH. Përfaqësuesit serbë boshnjakë do të kenë dy poste të tjera ministrore, të tregtisë së jashtme dhe të çështjeve civile. Do të ketë katër ministra boshnjakë, i jashtëm, i sigurimit, i mbrojtjes dhe i të drejtave të njeriut dhe refugjatëve si edhe tre ministra kroatë, komunikacioni e transporti, drejtësia dhe financa.

Kryetari i dhomës së përfaqësuesve në asamblenë parlamentare të BiH do të jetë Beriz Belkiç, një boshnjak nga SBiH ndërsa zëvendësit e tij do të jenë Niko Lozançiç i HDZBiH dhe Milorad Zhivkoviç i SNSD.

Shtatë parti: SDA, Partia për BiH (SBiH), SNSD, PDP, HDZBiH, HDZ 1990 dhe NS për Përmirësimin, qenë gjithashtu dakord mbi një strategji tërësore. Objektivat kryesore përmbajnë reformën kushtetuese, rritjen e investimit të huaj dhe përmbushjen e parakushteve për nënshkrimin e një marrëveshje stabilizimi e shoqërimi (SAA) me BE si edhe parakushtet për bashkimin me NATO.

Brukseli i ka përcaktuar reformën e policisë dhe të sistemeve transmetuese, bashkëpunimin me Gjykatën Penale Ndërkombëtare për ish Jugosllavinë, rregullimin e administratës publike dhe arsimit dhe një luftë më të fuqishme kundër korrupsionit, si kërkesat për SAA.

"Jami sigurt se do të bëj çdo gjë për të përmirësuar jetën e shtetasve tanë çdo ditë," tha Spiriç pas caktimit të tij. Ai tha se priste që këshilli i ministrave të BiH të ishte plotësisht veprues jo më pas se java e parë e shkurtit.

Përfaqësuesi i Lartë dhe përfaqësuesi i posaçëm i BE Kristian Shvarc-Shilling përshëndeti marrëveshjen e shtatë partive. Ai shprehu kënaqësinë me planet e qeverisë për të përqëndruar përpjekjet e saj në SAA dhe perspektivat për integrimin evro-atllantik.

Megjithatë, Nerzuk Çurak, një analist politik dhe profesor në Universitetin e Sarajevës, vë në dukje se partitë kanë qëndrime të kundërta mbi çështjet kryesore. SBiH dhe SNSD kanë pikpamje të ndryshme mbi kushtetutën e BiH. SBiH kundërshton me forcë ekzistencën për një kohë të gjatë të Republika Srpska ndërsa për SNSD ky subjekt nuk është i hapur për negociata.

"Fakti se SBiH dha kaq shumë vota për Spiriç si kryeministër mund të thotë dy gjëra," thoshte Çurak. "Ose kreu i SBiH Silajxhiç nuk është kompetent, ose është një marrëveshje e fshehur që qëndrimi i secilës parti mund të zbutet në të ardhmen."