Maqedonia fut taksën e rrafshtë

08/01/2007

Qeveria shpreson të miklojë investimin e huaj duke reduktuar ndjeshëm ngarkesën e taksës.

Nga Zoran Nikolovski për Southeast European Times në Shkup -- 08/01/07

Autoritetet shpresojnë se sistemi i ri do të nxisë ekonominë e vendit. [Getty Images]

Një ristrukturim i madh i sistemit të taksave të Maqedonisë është në proces këtë vit. Siç u premtua në zgjedhje, qeveria po fut një taksë të rrafshtë 12% për të ardhurat personale dhe të fitimit. Aktualisht taksat personale janë 15, 18 dhe 24%. Norma e taksës së fitimit është 15%, taksa e pronës 3% dhe VAT 15%.

Autoritetet thonë se kanë në plan të shkojnë edhe më tej, në një taksë të rrafshtë prej 10% në 2008.

Ekspertët dhe institucionet financiare thonë se sistemi i ri i taksave ka gjasa të ketë një ndikim pozitiv mbi ekonominë, veçanërisht lidhur me investimin e huaj në rritje. Mbledhja e taksave do të bëhet më e efektshme, duke e bërë evazionin fiskal më të vështirë.

Rregullime të ngjashme taksash në vende të tjera, veçanërisht në vendet balltike, kanë rrëfyer rezultate të favorshme. Ekonomia gri është reduktuar pasi bizneset shohin se përfitimet e shmangies nga taksat janë të vogla krahasuar me riskun.

Megjithatë, qeveria do të jetë nën presion për të ushtruar disiplinën financiare, bazuar në rënien potenciale të të ardhurave.

Përfaqësuesit e FMN vizituan kohët e fundit Maqedoninë për të diskutuar buxhetin për vitin 2007 dhe sipas Ministrit të Financave Trajko Slavevski, qenë përgjithësisht dakord me ndryshimet në politikën e taksave. Megjithatë, ata qenë merakosur rreth defiçitit të buxhetit. Qeveria pret një defiçit të madh, ndërsa Fondi do të donte ta shihte atë nën kontroll.

FMN thotë se shpreson që këto dallime të zgjidhen shpejt, duke lejuar kompletimin në janar të shqyrtimit të dytë të marrëveshjes së ndihmës së Maqedonisë me Fondin.

Mark Grifiths, kreu i misionit të FMN tha se ekipi i tij është i kënaqur me arritjet në politikën makroekonomike të Maqedonisë. Vendi ka norma të ulta inflacioni, një monedhë të qëndrueshme dhe 2% deri në 4.6% rritje për dhjetë vjet, tha ai. Reformat strukturore janë zbatuar edhe pse qeveria ndryshoi si rezultat i zgjedhjeve.

Grifiths përshëndeti synimin e qeverisë për rritje të lartë të qëndrueshme ekonomike dhe papunësi më të ulët duke mbajtur nën kontroll inflacionin. Maqedonia shpreson të dyfishojë standardin e jetesës gjatë dhjetë vjetëve të ardhshme, vuri në dukje ai.

Guvernatori i Bankës Kombëtare Petar Gosev parashikon inflacionin në 3%, së bashku me norma të qëndrueshme të këmbimit me monedhat e huaja dhe rritjen e rezervës së monedhës së huaj deri në 1.7 miliard $ në 2007.