Ahtisaari nuk do të propozojë pavarësinë e menjëhershme të Kosovës

01/11/2006

Propozimi i të dërguarit të OKB-së Marti Ahtisaari për një zgjidhje të çështjes së statusit të Kosovës do të përshkruajë siç thuhet, një sërë kushtesh që krahina duhet të përmbushë në udhën e saj për pavarësi të plotë nga Serbia.

(Reuters, DPA, AKI, International Herald Tribune, UPI, B92, Makfax - 31/10/06)

Marti Ahtisaari. [Getty Images]

Zgjidhja që i dërguari i OKB-së për bisedimet e statusit të Kosovës pritet të propozojë më pas këtë muaj do të përshkruajë një udhë graduale drejt shtetformimit, sipas një raporti të martën (31 tetor).

Duke cituar një diplomat me bazë në Bruksel, agjensia e lajmeve DPA tha se plani parashikon një periudhë të përkohshme gjatë së cilës krahina duhet të përmbushë një numër kriteresh që do të shpinin përfundimisht në pavarësinë e plotë nga Serbia.

Kushtet përfshijnë zbatimin e plotë të rendit të ligjit si edhe zhdukjen e korrupsionit nga organizmat qeveritare. Me përmbushjen e këtyre provave, shqiptarët e Kosovës do të provonin "se janë gati të pranojnë përgjegjësinë për pavarësinë e plotë të tyre", vuri në dukje zyrtari.

Propozimi thuhet se parashikon gjithashtu krijimin e gjashtë komunave të mbizotëruara nga serbët e Kosovës, grupi i dytë më i madh etnik në krahinë. Një kushtetutë e re do të garantonte mbrojtjen e të drejtave të pakicave të Kosovës.

Ahtisaari, ish presidenti filnlandez që kryeson bisedimet e ndërmjetësuara nga OKB mbi statusin përfundimtar të Kosovës gjatë tetë muajve të fundit, informoi në fundjavë sekretarin e përgjithshëm të OKB-së Kofi Anan rreth idesë së tij. Ai duhet t'ja paraqesë më pas planin e tij përfaqësuesve të Grupit të Kontaktit gjashtë-vendesh për Kosovën: Britania, Franca, Gjermania, Italia, Rusia dhe Shtetet e Bashkuara, në një takim në 10 nëntor.

Pas miratimit nga Grupi, ai do t'ua paraqesë propozimin e tij përfundimtar ekipeve negociuese serbe dhe shqiptarëve të Kosovës.

Ndërsa teknikisht ende pjesë e Serbisë, Kosova ka qenë nën administrimin e OKB-së që nga fundi i konfliktit të 1998-1999 në krahinë. Shumica e saj shqiptare po kërkon pavarësinë e plotë nga Serbia, ndërsa Beogradi ngul këmbë se e gjitha ç'mund të bjerë dakord është "autonomia e konsiderueshme".

Negociatat e kryesuara nga OKB midis zyrtarëve serbë e shqiptarë të Kosovës, të nisura në Vienë në 20 shkurt, kanë dështuar deri tani të mbushin hendekun.

Procesi i vendosjes së të ardhmes së Kosovës nuk duhet të vonohet, tha të martën i dërguari i SHBA për bisedimet e statusit, Frank Visner. Ai ishte në Beograd për takime me Presidentin serb Boris Tadiç, Kryeministrin Vojislav Koshtunica dhe Ministrin e Jashtëm Vuk Drashkoviç.

"Vonesa vetëm mund të zhgënjejë shpresat e atyre që rrojnë në Kosovë dhe mohojnë gjenden e lidhjeve me serbët..Shtetet e Bashkuara beson më tej se shtyrja vetëm do të lërë në embrion përcaktimin e këtij rajoni i cili ka nevojë të mbyllë derën ndaj së shkuarës dhe të përcaktojë të ardhmen," shtoi Visner.

Më vete të martën, i dërguari i BE për bisedimet e statusit, Stefan Lehne u kërkoi institucioneve të Kosovës të përfshiheshin më seriozisht në procesin e zgjidhjes së statusit. Gjatë bisedimeve me presidentin e Kosovës Fatmir Sejdiu në Prishtinë, Lehne theksoi gjithashtu rëndësinë e zbatimit të standardeve të vëna ndërkombëtarisht për Kosovën.