Ish shefi i sigurisë kombëtare të SHBA punësohet nga Shqipëria

07/09/2006

Kryeministri shqiptar Sali Berisha ka punësuar ish sekretarin e sigurimit kombëtar të SHBA, Tom Ridxh për të ndihmuar qeverinë e tij në përmbushjen e objektivit për anëtarësimin në NATO.

Nga Erlis Selimaj për Southeast European Times në Tiranë – 07/09/06

Përparësia kryesore e Ridxh do të jetë të ndihmojë Shqipërinë të përmbushë objektivin e saj të bashkimit me NATO në 2008. [Getty Images]

Kryeministri shqiptar Sali Berisha njoftoi të hënën (4 shtator) se ai ka punësuar ish sekretarin e sigurisë kombëtare të SHBA Tom Ridxh si një këshilltar të qeverisë mbi çështjet që përfshijnë anëtarësimin në NATO, luftën kundër korrupsionit dhe trajtimin e krimit të organizuar.

Ridxh do të fillojë punën këtë muaj, tha zëdhënësi i Berishës, Neritan Sejamini. Sipas marrëveshjes, Ridxh do të bëjë vizita të rastit në Shqipëri por do të punojë kryesisht nga Shtetet e Bashkuara.

Shqipëria aplikoi për anëtarësimin në NATO në 1992, kur Berisha, presidenti i parë jo-komunist i vendit, forcoi lidhjet me Uashingtonin. Vrulli u step megjithatë kur Berisha refuzoi këshillën e SHBA lidhur me një krizë të skemës piramidale që shpuri në rrëzimin e qeverisë së tij.

Që kur u bë kryeministër në korrik 2005, ai ka kërkuar të rindërtojë marrëdhënien.

Përparësia kryesore e Ridxh do të jetë të ndihmojë Shqipërinë për të përmbushur objektivin e saj për bashkimin me NATO në 2008, tha Berisha. "Ridxh do të asistojë dhe këshillojë qeverinë shqiptare në çështje që janë përparësi e lartë për cilëndo qeveri në botë: sigurimin e vendit," spjegoi ai.

Tirana nënshkroi një marrëveshje stabilizimi dhe shoqërimi me BE në qershor por pengesa mbeten në fusha të tilla si ekonomia, infrastruktura dhe lufta kundër krimit.

Ridxh, që ishte në Tiranë të hënën, tha se do të ishte një privilegj të punonte për qeverinë shqiptare. "Jam gati të mbështes ndryshimet e nevojshme që Shqipëria duhet të bëjë me qëllim që të bëhet një anëtare e NATO-s dhe një partner global në ekonominë ndërkombëtare. Unë besoj se këto objektiva mund të arrihen dhe unë pres të nis punën së bashku me ju për realizimin e tyre," tha Ridxh.

Në mars, ai mbajti bisedime me Ministrin e Mbrojtjes Fatmirt Mediu, Ministrin e Brendshëm Sokol Olldashi dhe Ministrin e Punëve Publike, Transportit dhe Telekomunikacionit, Lulzim Basha. Një nga çështjet e diskutuara ishte menazhimi dhe kontrolli i kufijve.

Ridxh, 61 vjeç, ndërpreu termin e tij të dytë si guvernator i Pensilvanisë kur Presidenti i SHBA Xhorxh W. Bush e caktoi atë për të bashkërenduar sigurinë kombëtare pas sulmeve të 11 shtatorit 2001 ndaj Shteteve të Bashkuara. I emëruar kreu i departamentit një vit më pas, ai u tërhoq nga posti në shkurt 2005.