Lockheed Martin dhe Shqipëria bëjnë marrëveshje për sistemin e mbikqyrjes detare

25/08/2006

Një kontratë e revizionuar midis Shqipërisë dhe firmës së SHBA Lockheed Martin u nënshkrua të martën.

Nga Erlis Selimaj për Southeast European Times në Tiranë – 25/08/06

Nënpresidentët e Lockheed Martin, Dan Allen (majtas) dhe Denise Saiki (në mes) dhe Ministri i Mbrojtjes i Shqipërisë, Fatmir Mediu nënshkruan marrëveshjen 17 milion $ të martën (22 gusht) në Tiranë. [Getty Images]

Firma e SHBA Lockheed Martin nënshkroi një marrëveshje të martën (22 gusht) për të ndërtuar sistemin e mbikqyrjes detare të Shqipërisë. Duke folur me gazetarët, Ministri i Mbrojtjes Fatmir Mediu tha se sistemi i ri do të ishte vendimtar në luftimin e terrorizmit dhe trafikimit si edhe në sigurinë e zgjeruar në det. Projekti pritet të kompletohet në katër vjet.

Marrëveshja 17 milion $ u miratua së pari në 2005 nga qeveria socialiste e ish kryeministrit Fatos Nano. Dokumenti u modifikua pastaj dhe përfundimisht u miratua këtë muaj nga kabineti i Sali Berishës.

"Ky investim është në kuadrin e programeve për rritjen e integrimit rajonal dhe është pjesë e strategjive të forcave të armatosura shqiptare për të parandaluar dukuritë e mundshme negative në zonat bregdetare dhe territorin detar të vendit," thoshte këshilli i ministrave në një deklaratë. Autoritetet po ngrenë një strukturë të re që do të merret me zbatimin e kontratës.

Lockheed Martin po ndërmerr gjithashtu modernizimin e infrastrukturës së menazhimit të trafikut ajror, sipas një zgjatje kontrate të miratuar vitin e kaluar. Kompania ka kryer tashmë një përtëritje të shpejtë të infrastrukturës së vjetër me dhjetvjeçarë, në kohë për të trajtuar trafikun ajror gjatë Olimpiadës 2004 në Greqinë fqinjë. Rregullimi është pjesë e Projektit të Modernizimit të Hapësirës Ajrore të Vendit.

Rinovimi përfshin një godinë të re të kontrolli të trafikut ajror, kullën e kontrolli të aeroportit, radarin me rreze të gjatë, ndihmësit e komunikimit dhe navigacionit dhe kompjutera dhe ekrane të rinj automatikë të trafikut ajror. Puna përfshin gjithashtu trainim shtesë për kontrollorët dhe inxhinierët dhe strukturat e tjera të modernizimit.

Puna e mëtejshme përfshin integrimin e sistemit Skyline me komunikimet e reja, aftësitë e navigacionit dhe të mbikqyrjes që do të lidhin sistemin e trafikut ajror me aeroporte të tjera në rajon.