Uisner: Negociata "të intensifikuara" nevojiten për zgjidhjen e Kosovës

31/07/2006

Të dyja palët në negociatat e statusit të Kosovës kanë nevojë të tregojnë fleksibilitet në mënyrë që të arrihet një marrëveshje para fundit të vitit, deklaroi i dërguari i SHBA-së, Frank Uisner, gjatë vizitave në Beograd dhe Prishtinë.

Nga Blerta Foniqi për Southeast European Times në Prishtinë – 31/07/06

Presidenti i Kosovës Fatmir Sejdiu (në të djathtë) mirëpret të enjten (27 korrik) të dërguarin special të SHBA-së për bisedimet e statusit të Kosovës Frank Uisner në Pristinë. [Laura Hasani]

I dërguari special i SHBA-së për procesin e statusit të Kosovës, Frank Uisner, ishte në Beograd dhe Prishtinë javën e kaluar për bisedime me të dyja palët. Ndërsa Shtetet e Bashkuara vazhdojnë të bëjnë presion për një zgjidhje këtë vit, ato nuk duan të paragjykojnë negociatat duke marrë një pozicion mbi të ardhmen e Kosovës, deklaroi ai.

"Ne nuk do të japim opinionet tona mbi statusin e Kosovës në këtë fazë, sepse ne mendojmë se është e rëndësishme të arrihet një marrëveshje midis të dyja palëve dhe negociatorëve," tha ai.

Nevojitet fleksibilitet nga të dyja ekipet negociuese gjatë fazës së re, "të përshpejtuar" të bisedimeve, tha i dërguari. "Kanë ngelur përpara vetëm disa javë për negociata intensive. Arritja e zgjidhjeve reale në ato negociata duhet të jetë mbi të gjitha prioriteti ynë më i madh dhe të arrihet ajo para se të fillojmë të shikojmë për hapin e ardhshëm," tha ai.

Megjithëse Uashingtoni nuk përkrah një zgjidhje të veçantë, ai mbështet fuqishëm pozicionin e Grupit të Kontaktit se nuk duhet të bëhet asnjë ndarje e Kosovës, sipas Uisnerit.

Parimi i jo copëzimit "është në përputhje si me praktikën ligjore ndërkombëtare po ashtu është një parim politik i rëndësishëm për të gjitha shtetet në këtë zonë të Ballkanit perëndimor," tha Uisner. Aftësia për të mbajtur stabilitetin dhe paqen në rajon është e lidhur direkt me të, shtoi ai.

Veç kësaj, Uisner tha, çdo marrëveshje që arrihet duhet të jetë e tillë që të mbrojë minoritetet në Kosovë dhe ti japi mundësinë atyre për një jetë të përshtatshme. Ai theksoi nevojën për të zbatuar masa specifike, duke përfshirë "zgjidhje reale" që kanë për qëllim mbrojtjen e trashëgimisë së kishave, kulturës dhe bashkive.

Vizita e Uisnerit erdhi pas të ashtuquajturit "takimi i elefantëve" midis drejtuesve të lartë serbë dhe kosovarë shqiptarë në Vjenë. Megjithëse delegacione nuk bënë gjë tjetër veç prezantimit të pozicioneve të tyre të deklaruara mbi Kosovën -- pala shqiptare që kërkon dhe pala serbe që kundërshton pavarësinë e plotë -- mbledhja u pa prapseprap si një moment historik.

Ndërkohë, një raund i ri bisedimesh teknike është programuar për 7-8 gusht. Fokusi do të jetë decentralizimi dhe të drejtat e minoriteteve.