Këshilli i Sigurimit i BE mblidhet mbi Kosovën

17/07/2006

Këshilli i Sigurimit i OKB-së dëgjoi javën e kaluar presidentin e Kosovës, kryeministrin serb dhe të dërguarin e OKB-së për bisedimet e statusit.

Nga Blerta Foniqi për Southeast European Times në Prishtinë – 17/07/06

Presidenti i Kosovës Fatmir Sejdiu (majtas) dhe Kryeministri serb Vojislav Koshtunica folën të dy përpara Këshillit të Sigurimit të OKB-së javën e kaluar. [Ilustrimi fotografik nga SETimes]

Presidenti i Kosovës Fatmir Sejdiu, Kryeministri i Serbisë Vojislav Koshtunica dhe i dërguari i OKB-së për negociatat e statusit, Marti Ahtisaari, informuan të gjithë javën e shkuar Këshillin e Sigurimit të OKB-së, duke ofruar paraqitje të ndryshme të situatës në krahinë.

Të enjten (13 korrik) Sejdiu foli për anëtarët e Këshillit. Ndonëse sesioni ishte i mbyllur për median, ai u tha reporterëve më pas se kishte bërë thirrje për pavarësinë e Kosovës, duke e quajtur atë të "panegociueshme".

"Populli i Kosvës ka një të drejtë për vetëvendosje dhe Kosova duhet të bëhet e pavarur dhe sovrane "me qëllim që të jetë një faktor i qëndrueshmërisë në Ballkan dhe një fqinj i mirë me të gjitha vendet e tjera," tha ai.

Ndonëse paraqitja e Sejdiut u bë gjatë një sesioni të jashtëm dhe jo zyrtar, ai ishte gjithsesi tepër i rëndësishëm, tha ndihmës shefi i UNMIK-ut Stivën Shçuk.

"Dua të siguroj se gjithkush e kupton sa e rëndësishme ishte kjo vizitë. Ndonëse ky është një takim jashtë sesionit zyrtar, ai takon çdo anëtar dhe çdo përfaqëses kryesor të Këshillit të Sigurimit. Ai po u flet atyre pa praninë e UNMIK-ut. Kështu që, për gjithsecilin që minimizon rëndësinë e asaj që po bën ai atje, do të thotë të mos kuptosh se ç'po ndodh," tha Shçuk.

Fjalimi i Koshtunicës, ndërkohë, shtjelloi qëndrimin qeveritar serb, kundërvënien ndaj pavarësisës së plotë për Kosovën dhe ofrimin në vend të saj të "autonomisë thelbësore". Sovraniteti për krahinën do të krijonte një shembull të rrezikshëm global, sugjeroi kryeministri serb.

"Zgjidhja për problemin e Kosovës që ne të gjithë punojmë të arrijmë duhet të jetë e saktë universalisht me qëllim që të shmangë një shembull lidhur me ndryshimin e kufijve të cilit mund t'i referohet çdo pakicë etnike me pretendime territoriale," u citua Koshtunica t'i thoshte Këshillit.

I dërguari i posaçëm Marti Ahtisaari e informoi Këshillin mbi përparimin e bisedimeve të drejtpërdrejta në Vienë, midis delegacioneve që përfaqësojnë Beogradin dhe Prishtinën. Ai tha se do të ftojë së shpejti krerët e secilës palë për një takim të nivelit të lartë.

"Kjo do të jetë hera e parë që krerët politikë të të dy palëve kanë një shans për të paraqitur rastin e tyre, se si e shohin çështjen e statusit. Pastaj ne do të vazhdojmë diskutimet mbi çështjet teknike për aq sa ta shohim se po bëjmë përparim dhe po ngushtojmë dallimet."

"Bisedimet do të përqëndrohen kryesisht në zonat mbrojtëse rreth vendeve ortodokse serbe dhe kulturore dhe mbi mekanizmat për të mbikqyrur dhe zbatuar marrëveshjen e vendosur në fushën e trashëgimisë kulturore e fetare," tha Ahtisaari.