Asi i NBA, Vlade Divac i rras kosh qeverisë serbe

06/07/2006

Vlade Divac, ish basketbollisti i famshëm i kthyer në biznesmen shënoi një fitore të madhe me vendimin e Gjykatës së Lartë Serbe që mund ta lejojë atë të blejë gazetën me qarkullim më të madh të vendit, të përditshmen e Beogradit, Vecernje Novosti.

Nga Georgi Mitev-Shantek për Southeast European Times në Beograd - 06/07/06

Vendimi i gjykatës serbe hap udhën për Vlade Divac të blejë të përditshmen e Beogradit, Vecernje Novosti. [OKB]

Ish ylli i NBA, Vlade Divac që ka luajtur me Chicago Bulls, Sacramento Kings dhe LA Lakers, ka fituar gjyqin e tij ndaj ministrisë për çështjet ekonomike. Ministria është përgjegjëse për Agjensinë Serbe të Regjistrimit të Biznesit e cila kishte refuzuar të regjistronte një rritje të kapitalit të aksioneve nga kompania e Divac në të përditshmen e Beogradit Vecernje Novosti.

Duke penguar atë që normalisht duhej të ishte një çështje teknike, agjensia u duk se mbante anën e atyre që kërkonin të ndalonin privatizimin e së përditshmes e cila është e njohur për qëndrimin nën urdhërat e qeverisë.

Sipas Gjykatës së Lartë, agjensia nuk ka bazë ligjore për ndaljen e procedurës së regjistrimit, pavarësisht nga polemika aktuale rreth pjesës së shtetit në kapitalin e aksioneve. Nuk është e qartë në se pjesa shtetërore i takon Serbisë apo ish shtetit të përbashkët të Serbi-Malit të Zi.

Pjesa që kompania e Divac qe ndaluar të mbante u qe lejuar një grupi aksionerësh të vegjël kryesuar nga kryeredaktori dhe menazheri kryesor i Vecernje Novosti, Manojlo Vukotiç.

Ylli i basketbollit u ankua duke thënë se masa ishte për shkak të presionit politik nga brenda partisë së kryeministrit serb Vojislav Koshtunica që me sa duket nuk ka qejf të humbë ndikimin që gëzon nëpërmjet gazetës me qarkullim më të madh në vend.

Divaci i shumëpëlqyer fillimisht u ofroi aksionerëve 2,500 euro për aksion duke premtuar se nuk do të ndikonte politikën botuese dhe nuk do të hiqte askënd. Ai tha se megjithatë, kjo nuk ishte oferta e tij përfundimtare.

Sipas një kompanie të pavarur kontrolli, Vecernje Novosti vlerësohet në 30 milion euro. Të tjerë të interesuar për gazetën përfshijnë Westdeutsche Allgemeine Zeitung, si edhe disa manjatë serbë. Gjermanët kanë ofruar 3,500 euro për aksion por pa përmendur një program social, ndërsa manjatët serbë nuk i kanë bërë ende publike ofertat e tyre.

Manovra me kapital të përbashkët në vend të një blerjeje të drejtpërdrejtë të aksioneve apo një marrje nën kontroll, është e ligjshme në cak. Por ajo është e zakonshme në Serbi, pasi qeveria dhe drejtoritë e ndërmarrjeve përdorin rrugëdalje të ndryshme ligjore për të penguar aksionerët e vegjël nga shitja e pjesëve të tyre në bursë.

Ky nuk është konflikti i parë i Divac me qeverinë serbe. Më parë, ai u orvat të blinte prodhuesin e ujit mineral më të shitur në Serbi, Knjaz Millosh. Por të tjerët e bllokuan atë, duke përfshirë Komisionin e Sigurimeve, lobistët dhe ambasadat e huaja. Kompania më së fundmi u ble nga një fond me bazë në ishujt Kajman.

Nuk është e mundur të apelohet vendimi i Gjykatës së Lartë. Qeveria ose duhet të veprojë shpejt dhe të caktojë një blerës, ose duhet të pranojë faktin që Divac, mbi të cilin asaj i mungon ndikimi, do të blejë më së fundi diçka në Serbi.