Kalimi kufitar në Maqedoni rinovuar nga projekti i financuar prej Bankës Botërore

18/04/2006

Koha e pritjes në kalimin kufitar të ngarkuar të Maqedonisë, Tabanovce do të reduktohet ndjeshëm si rezultat i një projekti rinovimi financuar nga qeveria dhe Banka Botërore.

Nga Marina Stojanovska për Southeast European Times në Shkup - 18/04/06

Kalimi kufitar i rinovuar i Tabanovce u hap në 12 prill. [Tomislav Georgiev]

Një kalim i rinovuar në Tabanovce, që lidh Maqdoninë me Serbinë fqinjë, u hap në 12 prill në kuadrin e Programit Rajonal për Lehtësimin e Tregtisë dhe Transportit në Evropën Juglindore (TTFSE). Projektin e financuan qeveria dhe Banka Botërore.

Tabanovce është nga pikat më të ngarkuara kufitare të vendit, përshkuar nga deri 700,000 makina dhe 2.5 milion pasagjerë në vit. Kalimi i rinovuar, që ka gjashtë korsi dalje nga Maqedonia dhe tetë hyrje në vend, do të ndihmojë të përmirësohet efektshmëria. Është ndërtuar një godinë e re policie dhe dogane dhe gjithashtu struktura ndihmëse të tilla si një nënstacion dhe agregatë diezel.

"Shpenzimet e transportit në Maqedoni janë më të larta se sa ato në vende të tjera me 10 deri 20 përqind për shkak se është vend i rrethuar nga tokë," tha në 12 prill në ceremoninë e hapjes, Sandra Blumenkamp, përfaqësuese e Bankës Botërore për Maqedoninë. "Kjo pasqyrohet në transportuesit. Ndaj vendi duhet të bëjë çmos të ulë këto shpenzime. Modernizimi i kalimit kufitar është vetëm një segment." Të tilla përpjekje, tha Blumenkamp, do të ndihmojnë gjithashtu tërheqjen e investitorëve.

"Projekti i lehtësismit të transportit që bashkon vendet në Evropën Juglindore ka për qëllim lehtësimin e tregtisë dhe sigurimin e rrjedhjes së shpejtë të mallrave dhe pasagjerëve dhe goditjen e korruspionit," tha Ministri i Financave Nikola Popovski. Sa për kalimin e ri kufitar, ai tha: " Ndryshimet sigurojnë një mjedis më të favorshëm për investimin në mbarë rajonin dhe një ekonomi të hapur e konkurruese. Ky kalim është një pjesë e korridorit 10 dhe është shumë i rëndësishëm për tregtinë ndërkombëtare."

Programi TTFSE ka për qëllim të reduktojë kostot jo-tarifore për tregtinë dhe transportin si edhe për të ndaluar kontrabandën dhe korrupsionin. Ai ka për qëllim gjithashtu të nxisë rrjedha më të buta dhe më pak të kushtueshme tregtie nëpër kufijtë në Evropën Juglindore dhe të sjellë procedurat doganore në nivelin e standardeteve të BE. Programi përfshin gjithashtu Shqipërinë, Bosnjë dhe Herzegovinën, Bullgarinë, Kroacinë, Moldavinë, Rumaninë dhe Serbi-Malin e Zi. TTFSE është një përpjekje bashkëpunimi midis qeverive të këtyre vendeve me Nismën e Bashkëpunimit të Evropës Juglindore (SECI), Bankën Botërore, BE dhe Shtetet e Bashkuara.