Shqipëria dhe Izraeli do të rritin marrëdhëniet

28/03/2006

Perspektivat për një bashkëpunim më të madh u vunë në pah gjatë një vizite të fundit nga një delegacion i ministrisë së jashtme të Izraelit, kryesuar nga nëndrejtori i ministrisë, ambasadori Mark Sofer.

Nga Erlis Selimaj për Southeast European Times në Tiranë – 28/03/06

“Ne mirëpresim të rritim marrëdhëniet në fushën e marketingut, shëndetësisë dhe bujqësisë. Këto fusha janë shënuar si me interes për të dy vendet," tha diplomati izraelit Mark Sofer. [Dosje]

Shqipëria dhe Izraeli po kërkojnë të rritin lidhjet e tyre politike dhe ekonomike me firmat izraelite që konsiderojnë investime në një numër sektorësh, duke përfshirë telekomunikacionet, kujdesin shëndetësor, energjinë dhe teknologjinë e lartë. Perspektivat për bashkëpunim më të madh u vunë në pah gjatë një vizite më parë këtë muaj nga një delegacion i ministrisë së jashtme izraelite, kryesuar nga nëndrejtori i ministrisë, ambasadori Mark Sofer.

"Izraeli dhe Shqipëria kanë patur marrëdhënie të mira në këta 15 vjet dhe ne nënshkruam në Tiranë një marrëveshje ekonomike e politike midis të dy vendeve. Me zyrtarët shqiptarë ne diskutuam gjithashtu gjendjen e Lindjes së Mesme dhe Ballkanit të cilat mbeten çështje vendimtare për të dyja vendet," i tha Sofer medias shqiptare.

Ndërsa ishte në Tiranë, delegacioni u takua me zëvendësministren e jashtme shqiptare Edit Harxhi.

Sipas Sofer, disa kompani izraelite punojnë ndërkohë në Shqipëri, kryesisht në sektorin bujqësor.

"Ne mirëpresim të rritim marrëdhëniet në fushën e marketingut, shëndetësisë dhe bujqësisë," tha Sofer. "Këto fusha janë shënuar si me interes për të dy vendet," shtoi ai, duke përmendur gjithashtu projektet për kompjuterizimin e shkollave si edhe përmirësimin e infrastrukturës dhe telekomunikacioneve.

Delegacioni përcolli interesin e firmave të Izraelit në sektorin e energjisë, turizmit, agro-industrisë dhe fusha të tjera. Ai u zotua gjithashtu për ndihmë në ndërtimin e parkut arkeologjik kulturor të Sarandës.

Përveç kësaj, të dy palët diskutuan forcimin e dialogut politik dhe organizimin e konsultimeve të rregullta vjetore.

Gjatë vizitës së tij, Sofer foli rreth lidhjeve historike me Shqipërinë.

"Jo vetëm në Izrael por kudo në botë, çifutët e admirojnë Shqipërinë. Jo vetëm për periudhën e Luftës së Dytë Botërore, kur Shqipëria shpëtoi çifutët, por gjithashtu për shkak se vendi është i mirënjohur për respektin e tij ndaj nesh. Mund të them se Shqipëria nuk ka patur kurrë anti-semitizëm," tha ai.

Shqipëria ka aktualisht një mision diplomatik përfaqësues në Tel Aviv, ndërsa Izraeli ka treguar se ka në plan të hapë një ambasadë në Tiranë në të ardhmen e afërt.