Kosteliç mahnit tifozët me shkarjen e pabesueshme

10/01/2006

Kroacia e nisi vitin 2006 me një veprimtari të madhe sportive, kupa e skive për femra në Malin Sljeme. Mijra tifozë besnikë dolën të brohorasin për Janica Kosteliç e cila u kthye në garë pas shumë kohësh, duke përfunduar e treta megjithë humbjen e njërit shkop.

Nga Kristina Cuk për Southeast European Times në Zagreb -- 10/01/06

Marlies Shild e Austrisë (në mes) feston fitoren e saj në garën e slalomit për femra në 5 janar, pranë Kathrin Zetel (majtas) të Austrisë që zuri vendin e dytë dhe Janica Kosteliç e Kroacisë. [AFP]

Për të dytin vit me rradhë, Zagrebi priti Kupën Botërore të Skive për femra. Veprimtaria e mbajtur në 5 janar në Malin Sljeme, tërhoqi emra të mëdhej në skitë për gra: Marlies Shild, Kathrin Zetel, Anja Parson, Kristina Koznik, Resi Stiegler, Tanja Putainen, për të konkurruar për kupën e kristaltë dhe titullin e Mbretëreshës së Dëborës të Kupës Botërore të Skive.

Lista kryesohej nga Janica Kosteliç e Kroacisë që shpresonte të fitonte veprimtarinë këtë vit pas një shfaqjeje zhgënjyese në 2004, kur u rrëzua dhe nuk e përfundoi garën. Sljeme është veçanërisht e rëndësishme për Kosteliç, që do të festonte ditëlindjen e saj të 24-t ditën e sllallomit, sepse është shpati ku ajo ka mësuar skitë.

Prova e parë e sllallomit filloi në 15:15. Kosteliç, ndoshta e shqetësuar se mund të përsëriste rrëzimin si më 2004, shkau më me kujdes e më ngadalë se zakonisht dhe përfundoi në vendin e shtatë. Tre orë më pas, ajo nisi provën e dytë, brohoritur nga më tepër se 20,000 përkrahës, duke ndeshur një katastrofë sapo doli nga porta e lëshimit dhe humbi shkopin dhe dorashkën e djathtë. Etja e saj për medalje dukej e vdekur. Po për mrekullimin e tifozëve, Kosteliç e vazhdoi garën duke shkarë me dorën e saj të zhveshur nëpër dëborë teksa bënte kthesat. Në përfundim, ajo përfundoi garën dhe fitoi vendin e tretë. Atmosfera në Sljeme ishte ngazëlluese, me tifozët që këndonin, thërrisnin e ndiznin flakë Bengali.

Fituesja e tre Olimpiadave mbetet në krye të renditjes së sllallomit me 280 pikë, si edhe të renditjes së përgjithshme të Kupës Botërore, me 652 pikë.

"Ishte një budallallëk ajo që më ndodhi mua," i tha më pas Kosteliç televizionit kroat HRT. "Mendova ta lë garën pas pjesës së parë por m'u desh ta mbaroj për shkak të atyre që organizuan veprimtarinë dhe të tifozëve që erdhën të më mbështesin."

"Sljeme është diçka e veçantë," shtoi ajo.

Dy austriake përfunduan përpara Kosteliç: e para Marlies Shild dhe e dyta Katrin Zetel. Së bashku me kupën e kristaltë, fituesja merr 60,000 euro, pasuar nga 30,000 euro për vendin e dytë dhe 15,000 euro për të tretin. Ishte një ngjarje e madhe e medias për Kroacinë, mbuluar nga pesë rrjete të huaj televizivë, nga Austria, Gjermania, Sllovenia dhe Suedia si edhe nga kanali Eurosport. Me mijra vetë punuan për të përgatitur veprimtarinë e cila konsiderohet gara më e shtrenjtë e sllallomit e botës.