Kosova do të bëjë regjistrimin e popullsisë në 2006

30/12/2005

Autoritetet në Kosovë kanë kompletuar fazën e parë të testimit për regjistrimin e popullsisë për vitin e ardhshëm, i pari që mbahet në krahinë që nga shpërbërja e Jugosllavisë.

Nga Erlis Selimaj për Southeast European Times në Tiranë – 30/12/05

Një regjistrim do të mbahet në 2006 për të mbledhur informacion rreth banorëve të Kosovës. [AFP]

Kosova po përgatitet të mbajë një regjistrim popullsie në 2006. Në mes të nëntorit, autoritetet lokale njoftuan përfundimin e fazës së parë të provës, e cila u bë në gjashtë komuna.

Zyrtarë nga ministria e shërbimeve publike thanë se kjo fazë, e kryer në Prishtinë, Prizren, Kaçanik, Skënderaj dhe Novo Brdo, ishte "e suksesshme" dhe qe shenjë e mirë për krejt projektin.

Duke zgjatur më tepër se dy javë, projekti pilot kishte për qëllim të mblidhte informacion mbi numrin e banorëve dhe shpërndarjen e tyre territoriale.

"Objektivi kryesor ishte të provoheshin instrumentet mbledhës të të dhënave dhe funksionimi i tyre dhe të zbuloheshin mangësitë e rastit të procedurës që duheshin eleminuar përpara se niste regjistrimi i përgjithshëm," tha Ministrja e Shërbimeve Publike Melihate Termkolli.

Të dhënat e popullsisë do të jenë midis faktorëve që ndikojnë procesin e përcaktimit të statusit të ardhshëm të Kosovës, shtoi Termkolli.

Teksa është ligjërisht pjesë e Serbi-Malit të Zi, Kosova ka qenë de facto një protektorat i OKB-së që nga fundi i konfliktit 1998-1999 atje. Shumica etnike shqiptare favorizon pavarësinë e plotë nga Serbia ndërsa Beogradi po kërkon të mbajë një formë sovraniteti.

Regjistrimi i fundit në Kosovë u bë në 1981 dhe qe organizuar nga autoritetet ish jugosllave.

Në atë kohë, banorët e Kosovës u gjet se qenë gati 2 milion. Megjithatë, shifra e përgjithshme si edhe shpërndarja demografike mendohet të ketë ndryshuar ndjeshëm si rezultat i konfliktit dhe zhvendosjeve lidhur me të.

Asambleja e Kosovës miratoi së pari një regjistrim popullsie më 2003, por miratimi përfundimtar i tij u vonua për shkak të kundërshtimeve nga përfaqësuesit serbë në parlament.