Gjykata kroate burgos ish paraushtarakun rreth vrasjeve në Srebrenicë

30/12/2005

Një serb kroat u dënua me 15 vjet burg të enjten për pjesëmarrjen e tij në vrasjen e gjashtë muslimanëve boshnjakë të paarmatosur, pranë Srebrenicës në 1995 dhe për torturimin e të burgosurve kroatë më 1991.

(Radio Netherlands - 30/12/05; AP, Reuters, AFP, BBC, RFE/RL, HINA - 29/12/05; BETA - 20/12/05; Reuters, The New York Times - 13/06/05)

Slobodan Davidoviç (në mes), një ish anëtar i njësisë paraushtarke Skorpions "mori pjesë aktive në trajtimin shnjerëzor dhe likuidimin" e gjashtë të rinjve muslimanë nga Srebrenica në 1995, tha në vendimin e tij gjykatësi i qarkut të Zagrebit Miroslav Sovanj. [AFP]

Gjykata e qarkut të Zagrebit dënoi një serb etnik me 15 vjet burg të enjten (29 dhjetor) për përfshirjen e tij në krimet e luftës të kryera gjatë konflikteve ballkanike herët në vitet 1990.

Slobodan Davidoviç, 52 vjeç, u arrestua në qershor, ditë pasi stacionet televizive anembanë ish Jugosllavisë transmetuan një video që tregonte anëtarët e një njësie policore paraushtarke serbe të quajtur Skorpions, të vrisnin me gjakftohtësi gjashtë të rinj muslimanë, të paarmatosur nga Srebrenica.

Me duart e tyre të lidhura pas, robërit, dy nga ta nën moshë, u zbritën nga një kamion në fshatin Godinska Bara pranë Trnovos në Bosnjën dhe Herzegovinën (BiH) lindore. Katër u vranë pas shpine ndërsa dy të tjerët u urdhëruan të shpinin trupat në një plevicë përpara se të vriteshin edhe vetë.

Regjistrimi tronditës, që u tregua së pari në gjyqin e krimeve të luftës kundër ish presidentit Slobodan Millosheviç në fillim të qershorit, çoi në arrestimet në Serbi të pesë anëtarëve të tjerë të njësisë paraushtarake, duke përfshirë komandantin e saj Slobodan Mediç. Autoritetet serbe donin ta gjykonin Davidoviç bashkë me të paditurit e tjerë por si shtetas kroat ai nuk mund të ekstradohej. Megjithatë, gjykata e qarkut e Zagrebit trajtoi rastin e saj.

Ndërsa procedimet gjyqësore filluan në fund të tetorit, Davidoviç, një ish kamarjer dhe punonjës ndërtimi me kohë të pjesëshme nga fshati i vogël lindor kroat Sidski Banovci, në jug të Vukovarit, nuk e pranoi fajin.

Gjyqtari kryesues Miroslav Sovanj tha të enjten se regjistrimi dha provë të qartë të pjesëmarrjes së Davidoviçit.

"Dëshmitë dhe video e ekzekutimeve në të cilat u njoh Davidoviç, tregojnë qartë se ai dhe të tjerët kanë marrë pjesë në vrasjen e muslimanëve," tha gjykatësi. Ish polici, shënoi gjithashtu ai, nuk kishte treguar mëshirë apo keqardhje për viktimat dhe kishte "marrë pjesë aktivisht në krejt operacionin" nga çasti që Mediç kishte urdhëruar ekzekutimet.

Duke spjeguar verdiktin e gjykatës, Sovanj tha gjithashtu se nuk kishte fakte që mund të shërbenin si rrethana lehtësuese pasi Davidoviç ishte një person i pjekur atë kohë. Për më tepër, pas fundit të konfliktit 1991-1995 në Kroaci dhe shërbimit të tij me Skorpions, ai u kthye në shtëpi sikur të mos kishte ndodhur gjësend.

Dhjetra serbë kroatë u bashkuan me Skorpions në 1991 kur lufta në republikën ish jugosllave ishte në kulm. Njësia përfundimisht shkoi të luftonte në BiH dhe mori pjesë në kapjen e Srebrenicës dhe masakrën që pasoi të deri 8,000 burrave e djemve boshnjakë muslimanë në korrik 1995.

Dënimi me 15 vjet burg i Davidoviç përfshin një afat nëntë vjet për torturën e ushtarëve të ushtrisë kroate në 1991 në një godinë të konvertuar në burg.

Sipas agjensisë kroate të lajmeve HINA, Davidoviç ka në plan ta apelojë verdiktin dhe do të mbetet në paraburgim deri sa vendimi të bëhet përfundimtar.