Suksesi i US Steel Serbia mund të ndihmojë në nxitjen e investimeve të huaja

04/10/2005

Që prej blerjes së prodhuesit të çelikut Sartid më 2003, US Steel i ka transformuar operacionet, duke u bërë prodhuesi më i madh i Serbisë dhe një histori e madhe suksesi në procesin e privatizimit.

Nga Dushan Kosanoviç për Southeast European Times në Beograd - 04/10/05

US Steel bleu firmën shtetërore Sartid më 2003. [US Steel]

Suksesi i US Steel Serbia mund të inkurajojë investime të huaja të tjera në Serbi e Mal të Zi, sipas CFO Xhon Kueid. Ai informoi Zëvendës-Ndihmësen e Shtetit të SH.B.A.-së Rosmari DiKarlo gjatë vizitës së saj muajin e kaluar për përvojën e prodhuesit të çelikut që më 2003, kur bleu firmën dikur shtetërore Sartid dhe gjashtë filialet e saj për 19 milionë euro, duke premtuar të investojë 124.2 milionë euro të tjera gjatë gjysmë-dekadës së ardhshme.

Si pjesë e marrëveshjes, US Steel me qendër në Pitsburg mori një angazhim prej tre vjetësh për të dhuruar pothuajse 4.2 milionë euro për çështje shoqërore të tilla si mirëqënia e fëmijëve, sportet dhe kultura. Firma është bërë një motorr i zhvillimit ekonomik vendas, duke siguruar vende pune për pothuajse 9,000 punëtorë në qytetin Smederovë. Ajo është gjithashtu eksportuesi më i madh i Serbisë. Në qershor të këtij viti, ndërmarrja rivendosi në funksionim një furrë shkrirje të rëndësishme në Smederovë, duke lejuar rritjen e prodhimit në 1.6 milionë ton këtë vit dhe për t'a dyfishuar atë më vonë në 2.2 milionë ton.

Operacioni është bërë një prej kapitujve më të suksesshëm në sagën serbe të privatizimeve, një proces i dëmtuar prej mungesës së rregulloreve, akuzave të shumta për mashtrime dhe korrupsion dhe një grumbull problemesh të tjera qëkur një ligj më 2001 hapi rrugën për shitjen e pasurive shtetërore. Rreth 1,406 firma janë shitur deri më tani, sipas të dhënave qeveritare.

Gjatë qëndrimit në Serbi e Mal të Zi, DiKarlo bëri një vizitë në Qendrën për Zhvillimin Ekonomik të themeluar nga US Steel në qendër të Beogradit. Duke përgëzuar suksesin e ndërmarrjes si një frymëzim për të gjithë investitorët potencialë, ajo tha se qeveria e Shteteve të Bashkuara është e angazhuar për të ndihmuar zhvillimin ekonomik në Serbi.

Në të njëjtën kohë, paralajmëroi ajo, qeveria duhet të bëjë detyrën e saj duke përmbushur detyrimet ndaj bashkësisë ndërkombëtare, përfshirë premtimet e bëra ndaj institucioneve financiare ndërkombëtare të tilla si FMN.

Ambasadori i SH.B.A.-së në Serbi e Mal të Zi Majkëll C. Polt u bëri jehonë komenteve të DiKarlos, duke theksuar se Uashingtoni e konsideron si mjaft të rëndësishëm përmirësimin e bashkëpunimit ekonomik me vendin ballkanik. Ai tha se është optimist në lidhje me zhvillimet e ardhshme, duke vërejtur se ende ka sfida përpara.

I takon qeverisë serbe për të hequr pengesat e mbetura ndaj një ekonomie me të vërtetë të tregut -- veçanërisht në fushën e privatizimit, që mbetet e ngadaltë -- dhe të përqëndrohet në zbatimin e reformave dhe ristrukturimit të infrastrukturës, tha Polt.