Boskovski dhe Tarkulovski do të qëndrojnë në Hagë

25/07/2005

Këshilli Gjyqësor në gjykatën e Hagës ka refuzuar kërkesën për lirimin me kusht për ish-Ministrin e Brendshëm Ljube Boskovski dhe ish-zyrtarin e sigurisë Johan Tarkulovski. Këshilli tha se Boskovski në të kaluarën është larguar nga Maqedonia dhe Tarkulovski mund të influencojë dëshmitarët.

Nga Marina Stojanovska për Southeast European Times në Shkup - 25/07/05

Kërkesa për lirim me kusht e ish-Ministrit të Brendshëm Ljube Boskovski' u mohua nga Këshilli Gjyqësor i gjykatës së Hagës. [Arkiv]

Ish-Ministri i Brendshëm Ljube Boskovski dhe ish-zyrtari i sigurisë Johan Tarkulovski do të mbeten nën arrest deri sa të fillojë gjyqi i tyre, sipas një vendimi më 18 korrik të Këshillit Gjyqësor të gjykatës së Hagës. Maqedonia i kishte kërkuar Këshillit më 4 korrik që ata të lirohen me kusht. "Qeveria maqedonase garanton se të paditurit do të vihen në dispozicion të gjykatës së Hagës nëse lirohen përkohësisht dhe lejohen të kthehen në Maqedoni," tha Ministria e Drejtësisë Meri Mlladenovska-Gjorgjievska.

Sipas avokatit të Boskovskit, Dragan Godzo, largimi i klientit të tij nga Maqedonia gjatë një çështje të mëparshme ishte fakti vendimtar në këtë refuzim. Boskovski, i cili ka shtetësi të dyfishtë maqedonase dhe kroate, përballet me akuzat në lidhje me vrasjen e gjashtë pakistanezëve dhe një nje indiani prej policisë maqedonase në Rastanski Lozja jashtë Shkupit më 2 mars 2002. Ish-ministri i brendshëm u largua në Kroaci vitin e kaluar, por u arrestua dhe u ndalua në Pula.

Lirimi i Tarkulovskit u refuzua sepse "nuk ka garanci të plota se ai nuk do të bëjë presion mbi viktimat dhe dëshmitarët," tha Këshilli.

Avokati i Boskovskit tha se do të apelojë vendimin e Këshillit Gjyqësor. "Unë isha optimist se Boskovski do të lirohej, por siç duket, Këshilli u dha përparësi argumenteve të paraqitura nga zyra e prokurorisë," tha Godzo.

"Përgjigja ndaj një apeli do të varet prej Komisionit të Apelit," tha Katina Terner, një zëdhënëse e gjykatës së Hagës. Ajo tha se komisioni do të vendosë mbi apelin dy javë deri në një muaj pas paraqitjes së tij.

Boskovski dhe Tarkulovski janë vetëm dy maqedonasit e paditur për krime lufte Sipas një padie të përbashkët të lëshuar nga gjykata më 15 mars, secili përballet me tre akuza për shkelje të ligjeve ose zakoneve të luftës në lidhje me konfliktin ndër-etnik më 2001 në Maqedoni. Mizoritë për të cilat akuzohen ata u kryhen ndërmjet 10 gushtit dhe 12 gushtit 2001, gjatë një kontrolli policor në fshatin Ljuboten.

Tarkulovski u ekstradua në Hagë më 16 mars dhe Boskovski më 24 mars. Të dy e deklaruan veten jofajtorë ndaj të gjitha akuzave.