US Steel Serbia rinis furrnaltën

30/06/2005

US Steel, e cila bleu Sartid të çelikut të Serbisë dy vjet më parë, ka hapur një furrnaltë në Smederevo, rreth 45 km në jug të Beogradit. Masa pritet të ndihmojë dyfishimin e prodhimit vjetor të çelikut në 2.2 milion ton.

Nga Dushan Kosanoviç për Southeast European Times në Beograd -- 30/06/05

US Steel Serbia, më parë e njohur si Sartid, është eksportuesi më i madh i Serbisë me fabrika në Smederevo, Sabac dhe Kucevo. [US Steel]

US Steel Serbia (USSS) rihapi në 22 qershor furrnaltën e saj numër një, pas një investimi 27.4 milion euro. Ceremonia në Smederevo, rreth 45 km në juglindje të kryeqytetit, u ndoq nga Presidenti serb Boris Tadiç, Kryeministri Vojislav Koshtunica, ambasadori i SHBA në Beograd Majkëll C. Polt dhe të tjerë zyrtarë të lartë.

Rinisja e furrnaltës e cila ishte jashtë pune për 18 vjet do të ndihmojë të rritet prodhimi i çelikut i Smeredevos në 1.6 milion ton këtë vit dhe të dyfishohet në 2.2 milion ton në vit, tha drejtori i përgjithshëm i USSS, Majkëll Fedorenko.

Masa vjen dy vjet pasi US Steel me bazë në Pitsburg bleu kompaninë e vetme të çelikut të Serbisë dhe gjashtë degët e saj për 19 milion euro. Drejtuesit e rinj premtuan të investojnë 124.2 milion euro gjatë pesë viteve të ardhshme. Deri tani janë shpenzuar 107.6 milion euro.

USSS, e njohur më parë si Sartid është sot eksportuesi më i madh i Serbisë me fabrika në Smederevo, Sabac dhe Kucevo. Ajo eksporton 65 deri 70 përqind të prodhimit të saj të përgjithshëm në Evropë dhe Lindjen e Mesme. Eksportet e kompanisë për vitin 2004 arritën në 347.6 milion euro. Në katër muajt e parë të këtij viti, prodhimet e hekurit dhe çelikut përbënin 16.7 përqind të eksporteve prej 1.13 miliard eurosh të Serbisë, sipas Dhomës Serbe të Tregttisë.

Presidenti i US Steel dhe CEO Xhon Surma e përshkroi 22 qershorin si një datë historike për kompaninë, Smeredevon e tërë Serbinë. Sipas Surma, ka shumë mundësira për bashkëpunim në çështjet me interes kombëtar.

Tadiç ishte dakord, duke ftuar përfaqësuesit e US Steel të ndihmonin për të nxitur investimet amerikane në vend.

"Çeliku i prodhuar në Smeredevo nuk është vetëm një prodhim, por gjithashtu një simbol i lidhjeve të forta SHBA-Serbi," u tha Koshtunica gazetarëve.

US Steel Serbia punëson 8,550 vetë dhe është zotuar, si pjesë e blerjes të Sartid, ta ruajë këtë numër për tre vjet. Zyrtarët thonë se nuk ka plane për shpunësime masive pasi kjo periudhë të mbarojë më 2006.