Qendra historike e Bukureshtit do të marrë fytyrë tjetër

17/02/2005

Puna restauruese në Bukureshtin qendror është planifikuar të nisë këtë verë. Deri në kohën që Rumania do të bëhet një anëtar i BE, kryeqyteti i saj do të ketë një qendër më të pastër e tërheqëse.

Nga Razvan Amariei për Southeast European Times në Bukuresht – 17/02/05

Rinovimi i Bukureshtit qendror është planifikuar të nisë këtë verë dhe do të zgjasë 18 muaj. [Dosje]

Bukureshti qendror do të bëhet së shpejti një vend i madh ndërtimi pasi një plan ambicioz rinovimi po vihet në zbatim. Kur të përfundojë projekti, qendra prej 57 hektarësh e qytetit, që besohet se ka potencial të konsiderueshëm komercial, do të nxisë ripërtëritjen e godinave, linjat e reja të ujit, gazit dhe ujrave të zeza, rrugët pa gropa, zonat vetëm për këmbësorë, mundësi më të mira parkimi dhe shumë të tjera lidhur me dyqanet, baret e restaurantet.

Puna është planifikuar të nisë këtë verë dhe do të vazhdojë 18 muaj. Afati përfundimtar është 1 janari 2007, ditën që Rumania është planifikuar të hyjë në BE. Kostoja e projektit, rreth 28 milion euro do të vijë kryesisht nga burime të huaja, duke përfshirë një kredi nga EBRD dhe një grant nga programi FARE i BE si edhe nga buxheti bashkiak i Bukureshtit.

Sipas zyrtarëve të bashkisë, rindërtimi synon të "rikrijojë aspektin e mëparshëm të zonës, por me strtuktura moderne", duke ruajtur trashëgiminë arkeologjike e arkitektonike të qytetit ndërkohë që do të shtyjë restaurimin e ndërtesave private . Autoritetet lokale kanë premtuar përjashtim nga taksat për ata që rinovojnë shtëpitë e tyre në qendrën historike. "Kjo do të jetë një mbështetje për ata që investojnë në punën rinovuese," tha Liviu Negoita, gubernatori i distriktit të tretë të Bukureshtit.

Synime të tjera përfshijnë reduktimin e ndotjeve dhe gazrav dhe ndihmën për rigjallërimin e bizneseve tradicionale në këtë zonë.

Gjatë epokës komuniste, qendra historike, e cila përmban godina apartamentesh që janë qindra vjet të lashta, rrënojat e oborrit mbretëror ndërtuar mbi pesë shekuj më parë nga Vlad i Nguluri në Hu dhe kishat mesjetare dhe hanet, qenë lënë pas dore. Apartamentet u shtetëzuan dhe u kthyen në shtëpi sociale. Dyqanet, restaurantet dhe zyrat gjithashtu u konfiskuan dhe zona e humbi sharmin e saj të vjetër.

Pas rënies së regjimit në 1989 pakë gjëra ndryshuan. "Standardi dhe veprimtaritë komerciale në zonë kanë ardhur vazhdimisht në rënie, i vetmi element i shënuar është hapja e disa hapësirave shlodhëse në themelet e mbetura të godinave të shekullit të 19," thotë arkitekti Vladimir Vinea. "Shumica e problemeve të strehimit të Bukureshtit është në qendrën historike, degradimi fizik, statusi i pasigurt juridik apo zënia abuzive e disa godinave ose apartamenteve".

Përveç kësaj, gjendja e keqe e transportit, shërbimeve dhe infrastrukturës së komunikacionit, ka shkurajuar çdo investim të madh në zonë. Kjo do të ndryshojë dramatikisht për mirë dy vitet e ardhëshme, premtojnë zyrtarët.

"Ne duhet të nisim punën sa më parë të jetë e mundur me qëllim që të ndalim degradimin e qendrës historike. Kjo zonë është karta e biznesit e Bukureshtit," ka thënë presidenti rumun Traian Bashesku.