Kryeministri maqedonas Kostov jep dorëheqjen

16/11/2004

Parlamenti do të njoftojë zyrtarisht dorëheqjen e Hari Kostov gjatë një takimi të planifikuar për të enjten, duke nisur një periudhë dhjetë-ditore gjatë së cilës Presidenti Branko Crvenkovski duhet të japë mandatin për formimin e një qeverie të re.

Nga Marija Lazarova për Southeast European Times në Shkup - 16/11/04

Kryeministri maqedonas Hari Kostov njoftoi dorëheqjen e tij të hënën (15 nëntor). [Tomislav Georgiev]

Kryeministri maqedonas Hari Kostov dha dorëheqjen të hënën (15 nëntor) pas pesë muajsh në detyrë. Masa pason dorëheqjen e të gjithë kabinetit ndonëse ai do të mbetet në post deri sa një qeveri e re të zgjidhet, për të penguar vakumin qeverisës.

Parlamenti do të njoftojë dorëheqjen e kryeministrit në një takim të planifikuar për të enjten, duke nisur një periudhë dhjetë-ditore gjatë së cilës Presidenti Branko Crvenkovski duhet të japë mandatin për formimin e qeverisë së re. Kushdo që ta marrë mandatin do të ketë 20 ditë në të cilat do të mbledhë ekipin e vet dhe do të dalë me një program pune.

"Pavarësisht nga angazhimi i tij deklarativ, një partner koalicioni në qeveri e kupton rolin dhe vendin e tij këtu vetëm si një instrument për zbatimin pjesor të proceseve politike të marrëveshjes kornizë të Ohrit duke mbrojtur zbatimin urgjent të parimit të përfaqësimit të drejtë e të duhur, i cili është një proces afat-gjatë pavarësisht nga rezultatet e rëndësishme në këtë fushë në dy vitet e fundit," tha Kostov.

Sipas kryeministrit, Bashkimi Demokratik për Integrimin (BDI) bllokoi ligjet që nuk ndikonin në marrëdhëniet ndëretnike por qenë të rëndësishme për tërheqjen e investimeve të huaja.

"Qeveria ka qenë bllokuar në periudhën e kaluar edhe në çështje lidhur me reformat ekonomike që i nënshtrohen disa fazave të procedurës parlamentare dhe janë pjesë e marrëveshjeve me institucionet financiare ndërkombëtare," tha Kostov. "Parimi i vënies së kushteve dhe zëvendësimit të njohurisë eksperte dhe profesionale me ujdi politike është bërë praktikë. Kjo ka ngushtuar mundësitë për veprim të efektshëm."

BDI shprehu habi për vendimin e Kostov. "Si partner koalicioni, ne nuk jemi as të informuar dhe as kemi ndonjë lajmërim të dorëheqjes së tij. Akuzat [e tij] kundër BDI janë tepër serioze. Ne kemi menduar kurdoherë se bashkëpunimi ynë me kryeministrin ka qenë i suksesshëm dhe produktiv. Deri më sot, ne së bashku përballëm disa sfida serioze, të tilla si ai i fundit me referendumin," tha zëdhënësja e partisë, Ermira Mehmeti.

Partia më e madhe në koalicionin qeverisës, Bashkimi Social Demokratik i Maqedonisë (SDSM) ka qenë pa udhëheqës që nga zgjedhja e Crvenkovskit si president. Konferenca e partisë fillimisht e planifikuar për gjysmën e dytë të muajit, është lëvizur për në 25 nëntor. Në pak ditët e ardhshme, SDSM do të vendosë në se kreu i saj i ri do të jetë gjithashtu kryeministri i ri apo të dy funksionet do të ndahen.