Mali i Zi mban konferencë mbi luftën kundër korrupsionit në rajon

25/10/2004

Një konferencë dy-ditore më parë këtë muaj në Podgoricë u përqëndrua në përmirësimin e bashkëpunimit dhe shkëmbimit të informacionit si pjesë e luftës kundër korrupsionit në Europën juglindore.

Nga Antonela Krstoviç për Southeast European Times në Podgoricë - 25/10/04

Në konferencë u paraqit një manual mbi luftën kundër korruspionit. [OSBE]

Një konferencë dy-ditore mbi forcimin e luftës kundër korupsionit rajonal u mbajt në Podgoricë më parë këtë muaj. Ngjarja ishte një përpjekje e përbashkët e Nismës Anti-korruspion të Paktit të Stabilitetit, misionit të OSBE në Serbi-Malin e Zi dhe Nismës Anti-korrupsion të qeverisë malazeze.

Fokusi ishte në përmirësimin e bashkëpunimit dhe shkëmbimin e përvojës dhe informacionit midis vendeve në rajon, me synimin për të rritur efektshmërinë e përpjekjeve anti-korrupsion. Konferenca diskutoi gjithashtu eleminimin e defekteve në legjislacionin penal i cili përbën një pengesë ndaj procedurave të hetimit dhe paraqitjes së fakteve.

Pjesëmarrësit përfshinin prokurorë, gjyqtarë, forca të policisë dhe personel të shërbimeve të zbulimit nga vendet e Europës juglindore si edhe përfaqësues të BE, donatorë dypalësh dhe një grup që këshillon prokurorët e qarqeve në rajon.

Nënkryeministri Dragan Gjuroviç, i cili është gjithashtu ministër i brendshëm i Malit të Zi, hapi konferencën. Të tjerë folës përfshinin sekretarin ekzekutiv të sekretariatit rajonal të nismës anti-korrupsion të paktit të stabilitetit, Veselin Sukoviç, dhe kreun e zyrës së OSBE në Podgoricë, Rudolf Bogner.

Gjuroviç tha se vendet e rajonit kishin nevojë të ishin të vendosura në marrjen e masave për të luftuar korrupsionin, veçanërisht nëpërmjet reformave të vazhdueshme të sistemeve ligjore, ekonomike e financiare dhe futjen e ligjeve të reja. Mali i Zi është në fazën përfundimtare të krijimit të një kuadri ligjor, duke përfshirë ligje të reja mbi procedurën penale dhe vendosjen e një prokurori të posaçëm për krimin e organizuar, i cili do të ndihmojë përmbushjen e standarteve ndërkombëtare për luftën kundër atyre tipeve të krimeve, tha ministri.

Ai gjithashtu njoftoi se qeveria do të futë së shpejti një strategji të zhvilluar në këshillim me Këshillin e Europës dhe OSBE, për luftën kundër korrupsionit dhe krimit të organizuar.

Sukoviç ndërkohë e përshkroi korrupsionin si një dukuri të rrezikshme e të komplikuar i cili është e nevojshme të frenohet nëpërmjet veprimtarive të bashkërenduara të organeve shtetërore, OJQ-ve dhe shoqërisë civile, shoqëruar nga bashkëpunimi ndërkombëtar.

Bogner tha se lufta kundër korruspionit të nivelit të lartë po bëhet një problem i madh për vendet e Europës juglindore, veçanërisht qëkurse është e qartë se vendet që janë të afta për trajtimin e suksesshëm të këtij problemi, do të provojnë përparim më të shpejtë në udhën e tyre për në anëtarësimin në BE. Efektshmëria në mbledhjen e fakteve, ndjekja e rasteve dhe mbajtja e gjyqeve përbën një provë thelbësore për verifikimin e pjekurisë institucionale të vendit, tha ai.

Ndëshkimi i korrupsionit nuk është vetëm i rëndësishëm për besueshmërinë e vendit, shtoi Bogner, por ndihmon gjithashtu rritjen e ndërgjegjësimit publik rreth kësaj çështjeje.