OKB, BE, SHBA përshëndesin thirrjen e Tadiç për serbët e Kosovës

07/10/2004

Thirrja e Presidentit serb Boris Tadiç për serbët e Kosovës që të marrin pjesë në zgjedhjet parlamentare të krahinës në 23 tetor ka fituar mbështetjen e qartë nga zyrtarët e OKB, BE dhe SHBA.

(AFP, Reuters, AP, Scotsman, BBC, UN, EU, Washington File - 06/10/04)

Trupat franceze parashutohen në fshatin Stanovce, Kosovë, në veri të Prishtinës, të mërkurën (6 tetor). [Laura Hasani]

Zyrtarët e OKB, BE dhe SHBA përshëndetën të mërkurën (6 tetor) një thirrje nga Presidenti serb Boris Tadiç për serbët e Kosovës që të marrin pjesë në zgjedhjet parlamentare të krahinës në 23 tetor.

"Unë u bëj thirrje serbëve të Kosovës të marrin pjesë në këto zgjedhje," tha Tadiç në televizionin shtetëror RTS të martën vonë, duke vënë gjithashtu edhe një afat për ngritjen e pushtetit vendor në enklavat serbe të Kosovës të njohura nga komuniteti ndërkombëtar . Nëqoftë se kjo nuk do të ndodhë për 90 ditë nga formimi i qeverisë së përkohshme të krahinës, tha Tadiç, ai personalisht do t'u kërkojë ligjbërësve serbë të tërhiqen nga parlamenti.

Tadiç, i cili do t'i shohë autoritetet serbe të kontrollojnë policinë, gjyqësorin, sistemet shëndetësore e arsimore brenda enklavave, theksoi se pjesëmarrja në proceset demokratike ishte rruga e vetme për të arritur këtë qëllim.

Duke përshëndetur thirrjen e presidentit, shefi i UNMIK-ut, Soren Jesen-Petersen, tha të mërkurën se pjesëmarrja e serbëve të Kosovës në votimin që vjen do të "hapë udhën për përfaqësimin e tyre në institucionet lokale dhe do të bëjë të mundur një dialog konstruktiv ndaj shqetësimeve të tyre".

"Nuk ka zëvendësim për pjesëmarrjen e drejtpërdrejtë në institucionet demokratike të cilat marrin vendime që kanë të bëjnë me jetën e cilitdo në Kosovë," tha ai.

Zyrtarët e BE dhe SHBA u bashkuan me Jesen-Petersen në përshëndetjen për thirrjen e Tadiç që serbët e Kosovës të votojnë . Shefi i politikës së jashtme të BE, Havier Solana, përgëzoi kreun serb për "një vendim shumë kurajoz", ndërsa ndihmësi i zëdhënësit të Departamentit të Shtetit, Adam Ereli, tha se pjesëmarrja e plotë serbe në zgjedhje është rruga më e mirë për të garantuar se shqetësimet e tyre do të merren parasysh dhe se zërat e tyre do të dëgjohen.

Megjithatë, thirrja e Tadiç u kritikua ashpër nga qeveria e kryeministrit Vojislav Koshtunica, e cila u kishte kërkuar serbëve të Kosovës të bojkotonin zgjedhjet. Anëtarë të Partisë Socialsite të ish presidentit jugosllav Slobodan Millosheviç dhe të Partisë ultranacionaliste Radikale Serbe (SRS) gjithashtu e sulmuan Tadiç. Duke pretenduar se ai ka kapërcyer pushtetin e vet, SRS nisi një mocion në parlament duke kërkuar heqjen e tij.

Ndërkohë, rreth 360 ushtarë francezë parashutuan në Kosovë të mërkurën si pjesë e "Operacionit Angazhim i Vendosur 2004" të NATO-s për të riforcuar KFOR-in përpara zgjedhjeve. Një total prej 2,000 trupash përforcuese do të vendosen në Kosovë deri në 6 nëntor. Gjermania dhe Italia gjithashtu do të kontribuojnë me trupa që pritet të mbërrijnë brenda javëve të ardhshme.