Blogerët reflektojnë mbi zgjedhjet e Kosovës

20/11/2009

Blogerët festojnë faktin se vëzhguesit ndërkombëtarë e gjetën procesin e votimit përgjithësisht të lirë dhe të rregullt, por janë të shqetësuar rreth parregullsive të zgjedhjeve.

Nga Art Malone dhe Linda Kardaku për Southeast European blog -- 20/11/09

Një votuese hedh votën në Prishtinë të dielën (15 nëntor). [Laura Hasani]

Të dielën (15 nëntor) votuesit e Kosovës u drejtuan për në qendrat e votimit në zgjedhjet e para që kur vendi shpalli pavarësinë e tij nga Serbia në shkurt 2008. Zgjedhjet për kryebashkiakët dhe anëtarët e asambleve bashkiake në 36 bashki, ishin një provë e madhe për demokracinë.

Mbikqyrësit ndërkombëtarë dhe vendas e konsideruan procesin një sukses. Rezultatet paraprakë të lëshuar nga Komisioni Qendror i Zgjedhjeve (KQZ) përcaktuan se 20 bashki do të duhet të zhvillojnë një raund tjetër votimi në dhjetor për shkak se asnjë kandidat nuk fitoi mbi pragun e duhur të votave.

Duket se Partia Demokratike e Kosovës (PDK) e Kryeministrit Hashim Thaçi mori funksionet më të shumta për kryebashkiakë, pasuar nga Lidhja Demokratike e Kosovës (LDK) e Presidentit Fatmir Sejdiu. Aleanca për Ardhmërinë e Kosovës (AAK) ishte e treta.

Por zgjedhjet nuk ishin pa parregullsira. Nën-Komisioni i Ankesave dhe Apeleve Zgjedhore ka marrë mbi 150 ankesa që nga 15 tetori, kur filloi fushata.

Blogerët shprehin si entusiazmin dhe zhgënjimin e tyre lidhur me zgjedhjet.

Patriot Gashi lavdëron mbarë Kosovën dhe PDK për nivelin e lartë të përgjegjësisë të treguar. "Ja kemi hapur dyert vetes për në Europë, urime të gjithëve, gëzuar!"

dritoni pasqyron gjendjen shpirtërore të fitores së PDK. " Z. Kryeministër çoje Kosovën përpara me investime dhe do të rizgjedhesh prapë kryeministër."

Ndryshe nga ai, Meli, një përkrahëse e AAK thotë: " Përpara Aleanca je ma e mira. Në zgjedhjet tjera ke me pri përpara."

Therandasi ofron një këndvështrim më analitik. "Ndaj mendimin se rezultatet e dalur nga zgjedhjet bashkiake janë të pritura. PDK është e fuqishme me këtë përqindje, LDK ka arritur të kthejë në gjirin e saj një pjesë të vetes, kurse elektorati i AAK-se mendoj se nuk është real dhe se do shprehet qartë në zgjedhjet e përgjithshme."

Antivota është skeptik ndaj të gjitha pikëpamjeve. "Ata kishin përgatitur fishekzjarre," thotë ai. "Duket sikur kishin arritur marrëveshje që më parë se kush do të fitonte."

Të tjerë shprehin shqetësime të ngjashme. Votuesi vret mendjen nëse vota e tij "është numëruar apo është shpallur e pavlefshme." Hasani është dakord dhe flet për shumicën kur deklaron se ai është "kunder vjedhjes se votave".

Megjithatë, duke lënë mënjanë kritikat, ramadan i sheh zgjedhjet nga një këndvështrim afat-gjatë. "Procesi i rregullt, i lirë dhe demokratik është shumë, shumë më i rëndesishëm se fitorja apo humbja e ndonjë bashkie," thotë ai.

Njomza përfundon duke ftuar bashkëpatritotë e saj që të mbajnë një qëndrim racional për zgjedhjet. "Nuk është kohë as e shampanjave dhe as e ngushllimeve," thotë ajo. "Eshtë kohë e gjetjes së gjuhës së bashkëpunimit dhe të zgjidhjeve për të përmiresuar jetën e qytetarëve."