Blogerët e Kosovës diskutojnë vizitën e Bajden

01/06/2009

Blogerët në Kosovë vlerësojnë vizitën e Xho Bajden për mbështetjen e çështjes së vendit të tyre për pavarësi, por serbët janë kritikë.

Nga Balkanblogs për Southeast European Times -- 01/06/09

Nën presidenti i SHBA Xho Bajden (në mes) përshëndetet nga presidenti i Kosovës Fatmir Sejdiu (majtas) dhe kryeministri Hashim Thaçi. [Laura Hasani/SETimes]

Nënpresidenti i SHBA Xho Bajden është i mirënjohur në Kosovë. Ndërsa shërbente si senator, ai ishte i zëshëm në përkrahjen e pavarësisë së Kosovës. Javën e shkuar, Bajden vizitoi Prishtinën dhe foli përpara anëtarëve të parlamentit.

"Pavarësia e Kosovës ishte dhe është në pikpamjen time dhe në pikpamjen e qeverisë sime, i vetmi opsion praktik për stabilitetin në rajon," tha ai. "Pavarësia juaj është e pakthyeshme, absolutisht e pakthyeshme."

Ndonse vizita e tij ndezi protesta nga serbët në Mitrovicë, Bajden mori një pritje entuziaste nga shqiptarët e Kosovës. Shumë nga ta e vlerësuan atë për qëndrimin e fortë.

"Faleminderit z.Baiden për fjalët e fuqishme që i dha sot Kosovës," shkruan Gjakova në Telegrafi. "Dhashtë ZOTI që kurrë të mos na le pa të madhen USA."

"Zotri Bajden është shumë i njoftuar me problemin e Kosovës pasi që ishte njeri nga ata burrat e mëdhenj që e shpëtoi popullin e Kosovës," shkruan Gafurr Hasani. "Gjë që nga ky popull nuk harrohet." Po ashtu, Faton në Shqip1 deklaron: "Zemra e Kosovës është Amerika, ajo që napshtoj."

Por Milan, at BalkanInsight, ka një pikpamje tjetër. "[Bajden] u kërkoi serbëve të Kosovës të 'integrohen në shoqërinë e re dhe jo të mbështeten në strukturat paralele të sponsorizuara nga Serbia'. Po pse ai nuk u kërkoi shqiptarëve në 2000-2008 të integrohen me Serbinë se sa të mbështeten në strukturat paralele të sponsorizuara nga SHBA?"

Rinor i përgjigjet këtij argumenti. "Integrimi me Serbinë do të thoshte të pranohej ajo që Serbia bëri dhjetë vjet më parë në Kosovë," shkruan ai. "Ai dhe krejt Perëndimi e dinë udhën e duhur drejt një Evrope të sigurtë dhe paqësore."

Per, në Telegraf, përshëndet vizitën por jo përpjekjet nga krerët e Kosovës për të marrë meritën për të. Ai u kërkon bashkëpatriotëve të tregojnë se Kosova meriton mbështetjen që ka marrë në Uashington.

"Të punojmë mirë që edhe Amerika të mburret me shtetin tonë që është meritë e saj dhe e këtij populli," këshillon ai.

"Kosova një vend i vogël por me dëshira të sinqerta, priti sot Njeriun e madh me zemër të madhe," përfundon Lumturie Ferizaj. "Historikisht, ku ka shkelë këmba e popullit amerikan, ka sjellë Paqe dhe Liri, kudo që ka pasë nevojë për këto vlera madhore e të dinjitetshme."