Nga pasarela e modës në Strasburg

20/03/2009

Ambicjet politike të vajzë së re të Presidentit rumun Traian Bashesku po shkaktojnë një furi midis blogerëve.

Nga Paul Kiokoiu për Southeast European Times në Bukuresht – 20/03/09

Elena Bashesku. [AFP]

Emri i modelistes së modës Elena Bashesku zgjon imazhe të shkëlqimit dhe luksit, por jo domosdoshmërisht ato të mendjeprehtësisë politike. Një vit më parë, vajza e presidentit rumun keqshqiptoi publikisht formën e shumësit të fjalës "sukses" duke ngjallur talljen e shtypit. Kur ajo shpalli se do të konkurojë për një vend në Parlamentin Europian (PE), reagimet ishin të shpejta dhe të zemëruara.

Alina Mungiu-Pippidi, një analiste politike e njohur që partia në pushtet po përpiqet që ta rekrutojë për në zgjedhjet e qershorit dhe presidente e Shoqërisë Akademike Rumune (SAR), tha se ajo nuk do të ishte kurrë në një listë partie me 28-vjeçaren Bashesku.

Presidenti Traian Bashesku u përgjigj në një intervistë se vajza e tij është "shumë më e zgjuar sesa ju mendoni". Midis debatit të nxehur publik, Elena Bashesku njoftoi të mërkurën (18 mars) se po largohej nga Partia Liberale Demokratike (PDL) për të konkuruar si e pavarur, por do të ribashkohet me të pas zgjedhjeve.

Blogerët japin mendimet e tyre, që priren të jenë tepër kritikë. "Unë nuk kam problem me Elena Basheskun si një karakter i shoqërisë [së lartë] ... Por me Elena Basheskun si një përfaqësuese e valës së re të politikanëve, kjo është diçka me të cilën kam problem," thoshte Andreea Vasile në blogun e tij Inpolitics.

Mohui bashkohet me korin e kritikëve. "Vras mendjen se çfarë 'do t'u thotë ajo kolegëve deputetë europianë? Do t'u japë leksion për modën, prerjet e çuditshme të flokëve dhe shtresës së të kuqit 5 mm (...)?" shkroi ajo.

"A mundet që dikush të shkruajë rreth kandidaturës së Elena Basheskut për zgjedhjet europiane pa marrë flakë nga zemërimi?" pyet Mihnea Marutza në blogun e vet. "Ne duhet të vrasim mendjen në se ajo ka përvojë politike dhe kapacitet intelektual për të përfaqësuar Rumaninë në BE."

Disa nuk janë dakord me ndjenjën mbizotëruese. "Unë besoj se Elena ka të gjitha shanset që të bëhet eurodeputetja më e re rumune. Unë jam i bindur se Elena do të marrë dyfishin e 100,000 nënshkrimeve të nevojshme ," shkruante Victor Roncea, kryeredaktor i së përditëshmes Ziua, në blogun e tij.

Anne-Marie Blejan, gazetare dhe specialiste e çështjeve europiane thotë në blogun e saj se e reja Bashesku do të përcaktojë tani fatin e saj. "Kandidatura e saj ... do ta ndihmojë atë ose t'i japë fund ambicjeve të saj politike ose të provojë për të gjithë ne që e kritikojmë atë ... se jemi tmerrësisht gabim," përfundoi ajo.