Zgjedhjet historike një mësim në demokraci, shkruajnë blogerët

07/11/2008

Fitorja e Barak Obamës në zgjedhjet presidenciale të SHBA ngjall koment pozitiv në rajon.

Nga Balkanblogs për Southeast European Times – 07/11/08

Kandidati demokratik presidencial Barak Obama (majtas) dhe e shoqja e tij Mishell (në qendër, majtas) qëndrojnë në podium me shokun e garës Xho Bajden dhe gruan e tij Xhil, gjatë kremtimit të fitores së tyre të martën (4 nëntor) në Çikago, Ilinoi. [Getty Images]

Të gjithë sytë qenë tek Shtetet e Bashkuara këtë javë pasi maratona e zgjedhjeve presidenciale arriti finalen e vet. Midis blogerëve në Evropën Juglindore, gjendja mbizotëruese ishte ajo optimiste, me shumë që përshëndesnin të dy kandidatët për demonstrimin e procesit demokratik.

"Barak Obama u bë president i Shteteve të Bashkuara duke ju spjeguar bashkëkombasve të tij se asgjë nuk është e pamundur," shkruan Catalin Tolontan, kryeredaktor i së përditëshmes rumune Gazeta Sporturilor, në blogun e vet. Ai i jep gjithashtu notën e tij të lartë fjalës së Xhon MekKejn. "Prekës por i fortë. [MekKejn] na dha ne një leksion në politikë, qytetërim dhe patriotizëm."

"Unë vazhdoj të vras mendjen se si ky moment historik mund të ndikojë tek ne," shkruan Dozy. "Është rasti tani për ne t'i përgjigjemi pyetjes: mundemi ne?" shton ai duke aluduar për slloganin e fushatës së Obamës dhe përpjekjet për përparim të Rumanisë.

Manu shikon tek Obama një orator të madh dhe dikë që ka një "optimizëm që është edhe i vërtetë ose i mirëstërvitur". Në një shënim më pragmatik, ai shton: "Ajo që na intreson ne tani është në se Shtetet e Bashkuara do të heqin kërkesat për viza për shtetasit rumunë."

Në Kroaci, Davorko Vidovic sjell ndërmend një imazh të paharruar nga nata e zgjedhjeve. "Ishte shumë prekëse të shihje një të moshuar afrikan-amerikan me lot në sy ndërsa qëndronte në Times Squere me dinjitet të qetë, duke ndjerë thellë atë që për dekada ishte vetëm një ëndërr."

Ndonse e përshkruan veten si tifoz i Obamës, Vidoviç mendon se MekKejn i dha fund fushatës në mënyrë të admirueshme. "Me një përgjegjësi dhe mençuri shtetari, ai uroi presidentin e 44 amerikan, duke u bërë thirrje të gjithë amerikanëve të qëndrojnë pas tij... Doja të shihja Kroacinë dhe politikanët e saj të bashkuar, pavarësisht interesave të tyre të ngushta personale, të grupit dhe partisë, të aftë të marrin përgjegjësinë e një pune përnjimend për të mirën më të madhe të vendit të tyre dhe shtetasve të tij."

"Barak Obama e bëri fjalimin e tij presidencial me frymëzim e dinjitet, foli me mençuri, me një argument historik që hidhte një vështrim përpara në të ardhmen. Fjalimi i tij padyshim sjell shpresë jo vetëm në Shtetet e Bashkuara por gjithandej në botë," shkruan Branislav Kovacevic Cole i Serbisë në blogun B92.

Në Shqipëri, Trebeshina i sheh zgjedhjet të dërgojnë një mesazh thelbësor. "Një erë e re po fryn sot në Amerikë dhe ne shpresojmë se Obama do ta mbajë premtimin e tij për botën."

"Kjo është madhështia e Amerikës dhe pse është ajo demokracia më e madhe në mbarë botën," shkruan Gerrard73 në Gazeta Korrieri. "Obama fitoi në disa shtete që qenë qendra të skllavërisë, një paradoks fantastik. Dikush ca vjet më parë pati një ëndërr dhe kjo ëndër po bëhet e vërtetë."