Droga dhe diplomacia bëjnë një përzjerje të keqe

12/09/2008

Ç'punë më e mirë do të ishte për një shpërndarës droge se sa ajo që ka imunitet diplomatik?

Nga Balkanblogs për Southeast European Times -- 12/09/08

[Getty Images]

Imazhi ndërkombëtar i Shqipërisë pësoi një tjetër goditje muajin e shkuar kur policia italiane kapi 1 kg kokainë gjetur në një makinë me targa diplomatike. Një shofer i ambasadës shqiptare, 33 vjeçari Arsen Selimllari, kishte parkuar makinën në një vend të paligjshëm në Milano duke tërhequr vëmendjen e karabinierëve që zbuluan shpejt drogën. Ata arrestuan Selimllarin dhe një shoqëruese femër.

Duke shkruar në bllogun shekulli, Lindita e sheh incidentin si të fundit në zinxhirin e lajmeve të këqia, duke përfshirë skandalet e trafikut të armëve dhe katastrofën në fabrikën e armëve në Gërdec.

Tregtia e drogës është bërë e përzjerë me institucionet shtetërore, komenton Artur. "Ky rast nuk është i vetmi i zbuluar," shkruan ai. "Për shqiptarët është bërë një traditë të kërkojnë punësim në qeveri me qëllim që të trafikojnë drogën pa pengesa."

"Fytyrat e ambasadave dhe të njerëzve tanë që punojnë atje janë përfaqësues të shtetit tonë anembanë botës," qahet Gjergji. "Incidenti i Romës është i dyti në të cilin persona me imunitet janë arrestuar nga autoritetet italiane dhe nuk është vështirë të imagjinohet se ambasada jonë në Itali, fytyra e shtetit tonë në një nga vendet që ne kemi një marrëdhënie shumë të mirë, po kundrohet tani nga drejtësia italiane."

"Kjo histori negative do të dëmtojë imazhin e Shqipërisë në botë, imazhin e shtetit shqiptar dhe të të gjithë shqiptarëve të zakonshëm," pranon Klaudio. "Bota do të ndryshojë opinionin e saj për ne vetëm kur ne të ndryshojmë veten tonë."

Por bazuar në sistemin e sotëm politik, perspektivat për një ndryshim të tillë janë të zbehta, argumenton Antero. "Në qoftë se njerëzit janë dakord se partitë politike po financohen nga fonde të paligjëshme, që mund të vijnë nga droga, përfitimet e korrupsionit apo të kontrabandës, si ka mundësi të ndryshosh?" pyet ai. "Ato nuk duhet të quhen parti politike por banda."

"Tani është e qartë se pse njerëzit janë të interesuar të punojnë në një mabasadë," vëren Zamira. "Është e rëndësishme për ta që të kenë imunitet. Ky është një turp i madh për Shqipërinë dhe diplomacinë tonë. Ne jemi kontrolluar në aeroportin e Tiranës më rreptë se në Francë apo Britani dhe nuk na kanë lënë të marrim as një shishe uji me vete. Si e kanë kaluar kokainën në Itali pa u kapur?"

Më së fundi, Emigranti bën një pyetje praktike. "Jam dakord me të tjerët," shkruan ajo. "Veprimtaritë e paligjëshme janë tani baza për demokracinë në Shqipëri. Por po të mos kemi ato, si do të bënim për të rrojtur?"