СРС ја промени позиција во врска со ратификацијата на ДСА, заменик-претседателот поднесе оставка

07/09/2008

БЕЛГРАД, Србија -- Toмислав Николиќ, заменик-претседателот на најголемата опозициска партија, Српската радикална партија (СРС), на состанокот на партија во петокот (5-ти септември) поднесе оставка. Овој потег уследи откако партијата одлучи да не го поддржи Договорот за стабилизација и асоцијација (ДСА) со ЕУ. Потпредседателот на СРС Драган Тодоровиќ, потврди дека партијата ја промени својата позиција пот притисок на својот водач, Воислав Шешељ, кому моментно му се суди во Хашкиот трибунал за воени злосторства. Николиќ во четвртокот објави дека партијата ќе го поддржи ДСА, по прифаќањето од страна на владата на предлогот на СРС за измена на предлог-законот за ратификацијата.

Во другите вести од петокот, претседателот Борис Тадиќ ја отфрли можноста за состанок со својот косовски колега, Фатмир Сејдиу. Тадиќ рече дека би можел да прифати вакви разговори само ако се организирани под надзор на ОН и ако целта биде да се разговара околу статусот на Косово. (Бета, Танјуг, БB92 - 05/09/08)

Рен ја повика Турција да ги забрза реформите за ЕУ

07/09/2008

АНКАРА, Турција -- Комесарот за проширување на ЕУ, Оли Рен, во петокот (5-ти септември) се состана со турскиот министер за надворешни работи, Али Бабаџан, на маргините од состанокот на министрите за надворешни работи на ЕУ во Франција. Рен го советуваше Бабаџан дека неговата земја треба да продолжи со полна пареа во спроведувањето на реформите поврзани со ЕУ, сега кога владата го преживеа случајот пред уставниот суд за нејзино затворање.

„Ние ја повикавме Турција да го реформира законот за политичките партии под итно, со цел да избегне ваков вид тешки политички кризи во иднина“, им рече Рен на новинарите по состанокот. Тој и Бабаџан, исто така, разговараа за конфликтот во Грузија и турскиот предлог за воспоставување платформа за кавкаска соработка и стабилност, како и своите напори да посредуваат во израелско-сириските мировни разговори. (Хуријет, Заман, Милијет, Ројтерс - 06/09/08)

Започна кампањата за локалните избори во БиХ

07/09/2008

САРАЕВО, Босна и Херцеговина (БиХ) -- Кампањата за локалните избори во Босна и Херцеговина (БиХ) официјално започна во петокот (5-ти септември). Истата ќе трае до 4-ти октомври, кога ќе започне 24-часовниот предозборен молк, пред гласањето на 5-ти октомври. Вкупно 29.043 потврдени кандидати, кои претставуваат 80 политички партии и независни групи, ќе се борат за позициите во 149 општини. Бројот на регистрираните гласачи е 3.024.127.

Централната изборна комисија и високиот претставник Мирослав Лајчак истакнаа дека имаат на располагање широк опсег санкции, со цел да се спречи евентуален политички радикализам. Делегација на Советот на Европа ќе пристигне во земјата на 2-ри октомври за да го следи предизборниот процес. (БИРН, Фена, РТРС, Дневни аваз - 05/09/08)

Македонското признавање на Косово зависи од два услови, вели Црвенковски

07/09/2008

СКОПЈЕ, Македонија -- Користењето на уставното име Република Македонија и процесот на одбележување на границата се двата клучни услови за Македонија да го признае Косово, рече во петокот (5-ти септември) македонскиот претседател Бранко Црвенковски. Запрашан дали признавањето ќе се случи за брзо време, сега кога започна процесот на демаркација, тој рече дека раководството ќе одлучи спрема тоа што е во најдобар интерес за земјата. Во саботата приштинскиот весник „Зери“ објави дека граничните линии се договорени, вклучително и чувствителната зона Дебелдех. Признавањето се очекува по 23-ти септември, според весникот. (Зери, Бета - 06/09/08, Телеграфи, Алсат - 05/09/08)

Случајот на Главаш ја загрижи ЕУ за хрватското судство

07/09/2008

ЗАГРЕБ, Хрватска -- Незадоволството на ЕУ од судскиот систем на Хрватска би можело да претставува голема пречка во преговорите за пристап, објавија медиумите во петокот (5-ти септември), цитирајќи извори во Брисел. Хрватскиот преговарачки тим во Брисел, наводно, добил писмо од ЕУ во кое се критикува начинот на кој се решаваат случаите на воени злостроства и другите судски прашања. Брисел е особено незадоволен од судењето на Браминир Главаш и шестмина други обвинети за воени злосторства. Судењето е одложено и ќе мора да започне од почеток по вторпат, поради процедурални причини.

Во саботата, пак, шефот на делегацијата на Европската комисија во Подгорица ја пофали Црна Гора како регионален водач во процесот на интеграција во ЕУ. „Ова значи дека шансите на Црна Гора за пристап во ЕУ се многу добри“, рече Леополд Маурер. (Бета, Вечерњи лист, Б92 - 05/09/08)

Тринаесет лица загинаа, а 30 други се повредени во автобуска несреќа во Хрватска

07/09/2008

ЗАГРЕБ, Хрватска -- Во автобуска несреќа рано во неделата (7-ми септември) во Хрватска загинаа најмалку 13 лица, а други 30 беа повредени, објавија локалните власти. Несреќата се случи во близина на градот Госпиќ на автопатот што го поврзува Загреб со пристанишниот град Сплит. Портпаролката на полицијата, Кристина Маодус, рече дека автобусот имал словачки регистарски таблички, но националноста на патниците не беше веднаш позната. (ХИНА, ХРТ, АФП - 07/09/08)

Во експлозии и судири загинаа четворица турски војници

07/09/2008

АНКАРА, Турција -- Во експлозија во петокот (5-ти септември) во југоисточната провинција Сирнак загинаа двајца турски војници, објавија локалните власти. Војниците загинале кога експлозивите поставени од милитантите на забранетата Курдистанска работничка партија (ПКК) експлодирале во близина на селото Гунејчам во Сирнак. Истиот ден во експлозија на нагазна мина поставена од терористите на ПКК загина еден турски војник во градот Јукшекова во југоисточната провинција Хакари, објави Генералштабот на својата веб-страница.

Во саботата во судири со терористите на ПКК загина еден турски водник, а беа повредени двајца други војници во градот Бајкан во југоисточната провинција Сиирт.

Во другите вести, турските воздухопловни сили во петокот објавија дека во третата Главна авионска база во централната провинција Коња ќе се одржи меѓународна вежба на военото воздухопловство, од понеделник (8-ми септември) до 19-ти септември. Борбени авиони од Турција, Соединетите Држави, Италија, Израел и НАТО ќе учествуваат на вежбата, се вели во соопштението. (новинска агенција Анадолу, СНН Турк, НТВ, Ксинхуа - 05/09/08)

Илјадници луѓе протестираа против економската политика во Грција

07/09/2008

АТИНА, Грција -- Повеќе од 10.000 луѓе се собраа во северниот грчки град Солун во саботата (6-ти септември), протестирајќи против владината економска политика. Митингот го организираше Генералната конфедерација на работниците на Грција. Демонстрантите маршираа низ градот додека премиерот Костас Караманлис го одржуваше својот годишен говор за економијата, на отворањето на Меѓународниот трговски саем во Солун. Некои демонстранти фрлаа домашно направени бомби, а голем број дуќани беа оштетени. Полицијата употреби солзавец за растерување на толпата и уапси 10 лица. Покрај ова, четири лица беа лесно повредени во судирите помеѓу две ривалски групи демонстранти. (Катимерини, In.news, Нафтемборики, ДПА - 07/09/08; AНА-МПА, ЕРТ, СКАИ, АП, АФП - 06/09/08)

Полицијата заплени 2,4 тони марихуана во југозападна Бугарија

07/09/2008

СОФИЈА, Бугарија -- Полицијата во југозападна Бугарија заплени 2,4 тони марихуана во најновата серија рации за дрога, објави во петокот (5-ти септември) Министерството за внатрешни работи. Дрогата беше запленета на полиња околу градовите Благоевград, Петрич, Сандански и Гоце Делчев, долго време познати по одгледувањето канабис. Рациите во регионот во август доведоа до конфискација на скоро шест тони марихуана. (БТА, Дарик, БНР, НЕТинфо, АФП - 05/09/08)