ЕУ и ОН ќе ги координираат разговорите Приштина-Белград

19/07/2010

ПРИШТИНА, Косово -- Шефицата за надворешна политика на ЕУ, Кетрин Ештон, се согласи со генералниот секретар на ОН, Бан Ки-мун, да ги координира идните разговори меѓу Косово и Србија, објави во неделата (18-ти јули) дневниот весник Експрес. Бан предложи шефот на УНМИК, Ламберто Заниер, поддржан од претставникот на ОН во Белград, Ендру Гилмор, да го координира процесот со ЕУ. Ештон одговори на барањето на Бан во писмо, од кое Експрес тврди дека има копија. Безбедноста и стабилноста во регионот се производ на заедничките напори, се вели во писмото, и се додава дека долгорочен успех ќе биде постигнат само преку кохерентен пристап на главните меѓународни фактори во Косово. Ештон напиша дека откако Меѓународниот суд на правдата ќе го објави своето мислење в четврток, ЕУ би сакала да им помогне на Белград и Приштина да продолжат по своите патишта кон Европа. Експрес јавува дека советникот на Ештон, Роберт Купер, ќе го предводи тимот на ЕУ за координирање на работата со претставниците на ОН. (Eкспрес, Кохавижн, Телеграфи - 18/07/10)