Рен и Баросо ја повикаа ЕУ да ја поддржи финансиската помош за Грција

21/03/2010

БРИСЕЛ, Белгија/АТИНА, Грција -- Во петокот (19-ти март), комесарот за монетарни прашања на ЕУ, Оли Рен, ги повика водачите на Унијата да се согласат со планот за финансиска помош за Грција, ако биде потребно. „Основно е кога станува збор за држава од областа на еврото да има европско водство и европска одговорност“, рече Рен. Повикот му претходи на самитот на ЕУ следната недела. Претседателот на Европската комисија Жозе Мануел Баросо, исто така, повика на договор на ЕУ за планот за спас.

Во меѓувреме, германскиот министер за финансии, Волфганг Шебле, во интервју за неделникот Билд ам Сонтаг рече дека неговата држава нема да се противи на тоа ЕУ да й обезбеди финансиска помош на Атина. „За помош од ЕУ за Грција, нема колективен договор. Во случај на исклучителна потреба, може да има координирана билатерална помош на доброволна основа“, рече Шебле.

Грчката влада се очекува во вторник да ги стави на дневен ред на парламентот новите даночни регулативи, како дел од мерките на штедење кои ќе й помогнат на земјата да се справи со својата должничка криза. Според медиумите, новиот предлог-закон предвидува 20 отсто даночна стапка на приходите на Православната црква од недвижностите и 45 отсто даночна стапка за годишните приходи од преку 100.000 евра. Новите „радикални“ правила ќе ги обврзат таксистите и сопствениците на бензиски пумпи и киосци да им издаваат сметки со ДДВ на муштериите. (AФП, Фајненшал тајмс - 20/03/10; Ројтерс, АФП, Катимерини, УПИ - 19/03/10)