Македонија ќе й одговори на Грција во МСП до 9-ти јуни
18/03/2010
СКОПЈЕ, Македонија -- Владата има рок до 9-ти јуни да й одговори на Грција, во врска со тужбата што Скопје ја поднесе во хашкиот Меѓународен суд на правдата (МСП) за наводното прекршување од страна на Грција на билатералниот договор, објавија локалните медиуми во средата (17-ти март). Македонија поднесе тужба во ноември 2008 година, обвинувајќи ја Грција за кршење на привремениот договор од 1995 година со блокирање на кандидатурата за влез на Скопје во НАТО за време на самитот на Алијансата во Букурешт. Според тој договор, Атина „се согласува да не се спротивставува“ на македонската апликација за членство во меѓународните организации и институции кои ја нарекуваат поранешна југословенска република Македонија. Грција поднесе контрааргументи на 19-ти јануари. (MИА, Макфакс, А1, МРТ - 17/03/10)