Министрите за финансии на ЕУ разговараа за Грција
16/03/2010
БРИСЕЛ, Белгија -- Министрите за финансии на ЕУ се состанаа во вторникот (16-ти март) во Брисел, на разговори околу ситуацијата во Грција, чии официјални претставници треба да претстават детален план на мерки за борба против финансиската криза. Доцна во понеделникот, министрите за финансии на Еврогрупата разговараа, исто така, за ситуацијата. Претседателот Жан-Клод Јункер по состанокот изјави само дека е постигнат договор за евентуален пакет за помош на Грција, но одби да даде други детали. Јункер, исто така, не сакаше да коментира околу извештаите дека ЕУ ќе обезбеди 25 милијарди помош за Грција. Австрискиот министер за финансии, Јозеф Прол, рече дека техничките услови се определени, така што Грција може да ја добие помошта во секој момент, макар што Атина сé уште не побарала ништо.
Во меѓувреме, АДЕДИ, синдикатот кој ги претставува државните службеници во Грција, во понеделникот објави дека планира уште еден 24-часовен штрајк -- или овој месец или следниот -- во знак на протест поради плановите за штедење на владата. Митингот е планиран за вторник во Атина. (Tа Неa - 16/03/10; Би-Би-Си, Ксинхуа, Ројтерс, ДПА, ИТАР-ТАСС - 15/03/10)