Романскиот Апелационен суд го поништи разрешувањето на Ника

30/11/2009

БУКУРЕШТ, Романија -- Апелациониот суд во петокот (27-ми ноември) донесе одлука дека разрешувањето на Дан Ника од позицијата министер за внатрешни работи е незаконско, оставајќи го министерството повторно во неизвесност. Судот го отфрли декретот на претседателот Трајан Башеску, издаден пред два месеци, со кој беше разрешен Ника, од Социјалдемократската партија (ПСД), што доведе до политичка криза. Ника беше сменет поради коментарите дека е можно да имало фалсификат на ноемвриските претседателски избори. Неговата ПСД се повлече од владата и формираше нов сојуз со Национал-либералната партија, со што падна владата на поранешниот премиер Емил Боц, на гласањето за доверба.

Одлуката на судот може да се обжали, но периодот е чувствителен, бидејќи Министерството за внатрешни работи е институцијата која ги организира изборите во Романија. Башеску се соочува со Мирчеа Џоана од ПСД во вториот круг од претседателските избори в недела. Актуелниот министер за внатрешни работи, Василе Блага, вели дека ќе ја почитува судската одлука и ќе се повлече, оставајќи го министерството во рацете на двата државни секретаријати. Техничка комисија ќе ги надгледува изборите, кои ќе бидат координирани од државниот секретар Михаи Капра. (Nine o'clock, Евениментул Зилеи, Котидианул - 30/11/09)