Кандидат на опозицијата нападнат во Митровица, Косово
13/11/2009
ПРИШТИНА, Косово -- Пред локалните избори в недела (15-ти ноември), Хисни Ахмети, кандидат за градоначалник на Митровица од опозицискиот Сојуз за иднината на Косово (ААК), бил нападнат во четвртокот вечер, додека возел кон местото на кое се одржувал настан од кампањата. Напаѓачите пукале во неговиот автомобил по патот кој ги поврзува Приштина и Митровица. Тој не бил повреден, но неговиот автомобил бил оштетен.
Другиот инцидент кој ги наруши последните денови од кампањата се случи во Звечан, град со претежно српско население во северно Косово. Граната била фрлена во близина на продавница, при што најверојатна цел било српско семејство кое ги најавило плановите да се кандидира за места во Општинското собрание на Звечан. Повеќето косовски Срби ќе ги бојкотираат изборите.
Исто така во четвртокот, две опозициски партии -- Демократската лига на Косово (ЛДК) и ААК -- ја обвинија Централната изборна комисија (ЦИК) за потенцијалните манипулации. Партиите велат дека ЦИК направила договор со приватни претпријатија за печатење на гласачките ливчиња и нивна дистрибуција до избирачките места, иако претпријатијата не ги исполниле условите за процесот и не одговараат на зададените критериуми. (Коха Диторе, Зери, Епока е Ре, Инфо Прес, Косова Сот - 13/11/09)