Косор разговараше за хрватско-словенечкиот пограничен спор во Брисел

24/07/2009

БРИСЕЛ, Белгија -- Новата хрватска премиерка Јадранка Косор во четвртокот (23-ти јули) во Брисел се состана со претставниците на ЕУ, нејзина прва посета во странство по изборот претходно овој месец. Претседателот на Европската комисија, Жозе Мануел Баросо, и претседателот на Европскиот парламент, Јержи Бузек, потврдија дека Хрватска и Словенија мора самите да го решат својот долготраен пограничен спор. Судирот ја попречи кандидатурата за пристапување на Хрватска во ЕУ во изминативе неколку месеци. ЕУ се обиде да посредува во еден кус период, но минатиот месец одлучи да го остави прашањето на Хрватска и Словенија.

Исто така во четвртокот, Баросо се состана со црногорскиот премиер Мило Ѓукановиќ, на разговори околу понатамошните чекори во процесот на европска интеграција на земјата. Посетата на Ѓукановиќ дојде еден ден откако комесарот за проширување на ЕУ, Оли Рен, го предаде прашалникот за подготвеноста на земјата за пристапување во блокот. Баросо го пофали напредокот на Црна Гора во исполнувањето на условите потребни за ЕУ и истакна дека приоритет сега треба да биде „ефикасното спроведување на законите“. (ХРТ, ХИНА, Вјесник, Кроејшн тајмс, Дневник, Пословни, Ројтерс, РТЦГ, Танјуг - 23/07/09)