Рен ги потврди шансите на Србија и Црна Гора за пристапување во ЕУ

23/07/2009

БЕЛГРАД, Србија -- Комесарот за проширување на ЕУ, Оли Рен, во средата (22-ри јули) ги увери српските власти дека Европската комисија (ЕК) е решена да ја внесе Србија во ЕУ, откако земјата ќе ги исполни своите обврски кон Трибуналот на ОН за воени злосторства. По состанокот со претседателот Борис Тадиќ, Рен додаде дека Србија треба да ја продлабочи регионалната соработка. Тадиќ, пак, рече дека членството во ЕУ претставува најважна стратешка цел на Србија. Тој му рече на Рен дека Белград ќе ги спроведе реформите потребни за ЕУ и ќе се обиде да ги исполни преостанатите услови за да биде вклучен во безвизниот режим од следниот јануари.

Од Белград, Рен отпатува за Подгорица, каде што го предаде прашалникот за демократските реформи и спроведувањето на Договорот за стабилизација и асоцијација помеѓу ЕУ и Црна Гора. Подгорица мора да одговори на повеќе од 2.100 прашања. Врз основа на овие одговори, ЕУ ќе ја процени подготвеноста на Црна Гора за членство.

Премиерот Мило Ѓукановиќ рече дека овој момент претставува историска пресвртница за Црна Гора. Тој ќе се состане со претседателот на ЕК, Жозе Мануел Баросо, и заменик-претседателот на ЕК, Жак Баро, во четврток во Брисел, на разговори околу понатамошните чекори во процесот на европска интеграција на земјата. Црна Гора се надева дека ќе добие кандидатски статус следната година и ќе отвори разговори за пристапување до 2011 година. (Taнјуг, РТЦГ, Минa - 23/07/09; РТС, Танјуг, Б92, Бета, РТЦГ, ДПА, АФП - 22/07/09)