Македонската партија ДУИ одреди краен рок за спорот околу името

29/05/2009

СКОПЈЕ, Македонија -- Партијата на етничките Албанци Демократска унија за интеграција (ДУИ) одреди краен рок за нејзиниот коалициски партнер ВМРО-ДПМНЕ да го реши спорот околу името со Грција и да го придвижи блокираниот процес на евроатланска интеграција до крајот на годинава. Ако не се случи тоа, Албанците ќе бараат нови алтернативи, изјави членката на ДУИ Теута Арифи за локалната телевизија Алсат М во четвртокот (28-ми мај). Таа предупреди дека секој обид за промена на курсот на Македонија кон интеграцијата во ЕУ и НАТО е опасен. Грција ја блокира кандидатурата на Македонија за НАТО поради долготрајниот спор на двете земји во врска со името. Анкетите на јавното мислење покажуваат дека етничките Албанци се повеќе за компромис отколку Македонците, кои го поврзуваат името на земјата со својот идентитет.

Исто така во четвртокот, водачот на ДУИ Али Ахмети рече дека владејачката коалиција е стабилна и дека неговата партија нема да ја напушти владата. Тој го изјави ова по откажаната посета на косовскиот претседател Фатмир Сејдиу на Македонија, поради извештаите дека нема да биде пречекан со државни почести. (МРТ, Макфакс - 29/05/09; Дневник, Утрински весник - 28/05/09)