Лајчак и Додик се согласија по локалните избори во БиХ да започнат разговори за уставните реформи

18/06/2008

БАЊА ЛУКА, Босна и Херцеговина (БиХ) -- Високиот претставник Мирослав Лајчак и премиерот на Република Српска, Милорад Додик, во вторникот (17-ти јуни) во Бања Лука се согласија веднаш по локалните избори на 5-ти октомври да започнат разговори за уставните реформи. Лајчак потврди дека БиХ нема да може да ја спроведе реформската агенда на ЕУ што води до кандидатски статус според сегашниот уставен поредок. Лајчак, исто така, истакна дека со оглед на тоа што БиХ го потпиша Договорот за стабилизација и асоцијација со ЕУ оваа недела, сите партии мора да загарантираат проевропска атмосфера пред и за време на локалните избори. Двајцата претставници, исто така, разговараа за престојниот состанок на Советот за спроведување на мирот, на кој БиХ мора да докаже дека исполнила три од петте услови за затворање на Канцеларијата на високиот претставник. (Дневни аваз, Независне новине - 18/06/08; Фена, РТРС - 17/06/08)