НАТО го зголеми военото присуство во Косово

24/01/2008

ПРИШТИНА, Косово, Србија-- НАТО го зголеми бројот на своите војници во Косово, објави во средата (23-ти јануари) портпаролот на КФОР. Италијанскиот баталјон од 560 војници започна со распоредувањето во мисијата која ќе трае до почетокот на март. Портпаролот рече дека дополнителниот број војници ќе вежбаат во покраината на редовна база, но и ќе ја демонстрираат способноста на Алијансата за испраќање засилување на своите мисии низ целиот свет.

Исто така, Романија објави дека е подготвена да распореди околу 175 полицајци и жандерми во Косово како дел од планираната специјална мисија на ЕУ во покраината. Српскиот премиер Воислав Коштуница во средата потврди дека мисијата на ЕУ би била „нелегална“ без овластување на ОН.

Во другите вести, рускиот министер за надворешни работи, Сергеј Лавров, во средата предупреди дека независноста на Косово би можела да предизвика верижна реакција во околу 200 области околу целиот свет. „Ако му дозволиме некому да стори нешто, многу други ќе очекуваат ист третман“, рече тој. (AФП, Еуроњус, ДВ, Свобода радио, Медифакс, Бета, РТС, Ксинхуа, Танјуг, Косовалајв, РФЕ, РТК, Балканвеб - 23/01/08)