Заменик-шефот на УНМИК вели дека ОН ја испитуваат неговата работа во Косово

27/09/2007

ПРИШТИНА, Косово, Србија -- Заменик-шефот на УНМИК, Стивен Шук, во средата (26-ти септември) рече дека има информации оти Канцеларијата за внатрешна контрола на ОН води истрага за неговото однесување. „Според информациите што успеав да ги добијам, истрагата е поврзана со моето наводно агресивно однесување, непрофесионализам и блиски односи со министерот за енергија, Етем Чеку, и поранешниот косовски премиер Рамуш Харадинај, и се протега до личните односи што наводно сум ги имал со некои жени од Косово и некои што работат во мисијата на УНМИК“, рече тој на прес-конференцијата во Приштина.

Шук негираше дека е виновен за што било друго освен за тоа што си ја сака работата и е целосно посветен на истата. „Мојата ,вина’ може да се однесува и на фактот што отсекогаш сум ги почитувал луѓето со кои сум работел, меѓу кои е и Харадинај додека беше премиер“, рече тој. „Го почитував неговото однесување кога Хашкиот трибунал објави обвинение против него бидејќи го поддржував организирањето на избори во Косово во тоа време.“ Тој рече дека не планира да поднесе оставка. (Блиц, Б92, Телеграфи, РТК, РФЕ, Танјуг, Косова прес, Косова лајв, Бета - 26/09/07)