РС е близу до фаќање на бегалецот обвинет за воени злосторства Жупљанин, рече полициски претставник

17/09/2007

САРАЕВО, Босна и Херцеговина (БиХ) -- Бегалецот обвинет за воени злосторства Стојан Жупљанин наскоро ќе биде фатен, изјави полицискиот претставник на Република Српска (РС) одговорен за соработка со Хашкиот трибунал за воени злосторства Драги Милошевиќ, за „Вашингтон пост“ во неделата (16-ти септември). „Ние сме многу близу до него и сé повеќе му се приближуваме“, рече Милошевиќ, додавајќи дека властите имаат информации оти „тој живее како животно во природа или како селанец на нивите. Тој е тука и неговите врски со Србија се пресечени. Дури и неговото семејство е против него“, рече Милошевиќ.

На 31-ви мај полицијата во РС го уапси поранешниот армиски офицер на РС, Здравко Толимир, за кој се смета дека е еден од главните организатори на мрежата што му помага на главниот обвинет за воени злосторства Ратко Младиќ да ја избегне правдата. (Независне новине, Вашингтон пост - 16/09/07)