Претседателски избори

Трајан Башеску, кандидатот на коалицијата на Правдата и вистината, победи во вториот круг од претседателските избори во Романија на 12-ти декември 2004 година, поразувајќи го Адријан Настасе од сојузот на Социјалдемократската партија и Хуманистичката партија. Башеску доби 5.126.794 гласови (51,2 отсто), наспрема 4.881.520 гласови (48,7 отсто) за Настасе. Одѕивот на гласачите во вториот круг беше 54,80 отсто, односно 10.112.262 од вкупно 18.449.676 граѓани со право на глас излегоа на гласање. Резултатите од вториот круг на изборите претставуваа пресврт во однос на првиот круг на 28-ми ноември, на кој Настасе победи со мала разлика од 40,94 отсто наспрема 33,92 отсто од гласовите. Покрај Башеску и Настасе, уште неколку други кандидати учествуваа во првиот круг, меѓу кои и Корнелиу Вадим Тудор од ултранационалистичката партија Голема Романија (12,57 отсто), Марко Бела од Демократскиот сојуз на Унгарците во Романија (5,10 отсто), Георге Кориолан Чуханду од Демократско-националната селанска партија (1,9 отсто), Георге Бакали од партијата Нова генерација (1,77 отсто) и Петре Роман од Партијата на демократските сили на Романија (1,35 отсто). Гласањето во првиот круг помина во сенката на наводите за фалсификат, при што опозициските политичари и неколку невладини организации ги обвинија социјалдемократите дека организирале систематски прекршувања, како што е пренесувањето на своите поддржувачи со автобуси за да гласаат на повеќе избирачки места.

Парламентарни избори

Парламентарните избори во Романија на 28-ми ноември резултираа со тесна разлика помеѓу сојузот на Социјалдемократската партија и Хуманистичката партија, кој освои 132 места во Домот на делегатите и 57 места во Сенатот и сојузот на Правдата и вистината, кој освои 112 места во Домот на делегатите и 49 места во Сенатот. Ултранационалистите на Корнелиу Вадум Тудор освоија 48 места во Домот и 21 место во Сенатот, а Демократскиот сојуз на Унгарците освои 22 места во Домот и 10 места во Сенатот. Другите помали партии освоија вкупно 18 места во Домот на делегатите. Во средата, 22-ти декември, новоизбраниот претседател Трајан Башеску официјално му го додели мандатот за формирање на новата влада на мандаторот Калин Попеску Таричеану.