Косово

Краток Преглед на Изборите

Демократската лига на Косово (ЛДК) на косовскиот претседател Ибрахим Ругова победи на парламентарните избори во провинцијата на 23-ти октомври, но не успеа да добие целосно мнозинство. Како резултат на тоа партијата мораше да побара партнери за формирање коалициска влада. Водачот на Алијансата за иднината на Косово (ААК), Рамуш Харадинај, ќе биде следниот премиер, според договорот постигнат со ЛДК.

Поради грешките во изборните резултати, Централната изборна комисија нареди прегласување. Конечните резултати, објавени во средата (3-ти ноември) покажаа дека ЛДК освои 45,42 отсто од гласовите и ќе задржи 47 пратенички места во Собранието на провинцијата, кое го сочинуваат вкупно 120 пратеници и во кое 20 места се резервирани за претставниците на косовските малцинства. Демократската партија на Косово на Хашим Тачи беше втора со 28,9 отсто од гласовите, со што доби 30 пратенички места -- четири повеќе од освоените на изборите во 2001 година.

ААК беше трета со 8,4 отсто од гласовите, освојувајќи 9 пратенички места. ОРА, новата партија основана од страна на издавачот и новинар Ветон Сурои, беше четврта со 6,23 отсто од гласовите и 7 пратенички места. Вкупно шест други партии на косовските Албанци освоија седум од 100 мултиетнички места во Собранието.

Дванаесет ентитети имаа право да се натреваруваат за 20-те места резервирани за косовските малцинства, се вели во соопштението на ОБСЕ од средата. Од десет места за претставниците на косовските Срби осум доби Српската листа за Косово и Метохија, а две Граѓанската иницијатива на Србија. Бошњачкиот ентитет Вакат доби 3 места, вклучувајќи и две резервирани места. СДА го освои другото резервирано место за бошњачката заедница.

Турската партија и Косовската демократска турска партија (КДТП) освоија вкупно три места, вклучувајќи и две места резервирани за нивните заедници. Новата демократска иницијатива на Косово (ИРДК) доби две од вкупно четири места резервирани за Ромите, Ашкалите и Египќаните, додека Демократската партија на Косово (ПДАК) на албанските Ашкали и Обединетата партија на косовските Роми (ПРЕБК) освоија по едно место.

Едно место за Гораните освои Граѓанската иницијатива на Гора (ГИГ).

Одѕивот според конечните резултати изнесуваше 53, 37 отсто. Скоро 660.000 од вкупно 1,3 милиони регистрирани гласачи учествуваа на изборите. Сепак, одѕивот од страна на заедницата на косовските Срби беше помал од 1 отсто. Мнозинството граѓани со право на глас од оваа група одбија да гласаат, следејќи ги повиците за бојкот од страна на српскиот премиер Воислав Коштуница, други белградски функционери и Српската православна црква.